सेट परीक्षेची तारीख ठरली ;  ७ एप्रिलला होणार परीक्षा

एज्युवार्ता न्यूज नेटवर्क 

सावित्रीबाई फुले पुणे विद्यापीठाच्या (Savitribai Phule Pune University) सेट विभागातर्फे सहाय्यक प्राध्यापक पदाच्या पात्रतेसाठी घेतली जाणारी ३९ वी सेट परीक्षा (SET exam) येत्या ७ एप्रिल रोजी घेण्यात येणार आहे. विद्यापीठाचे प्रभारी कुलसचिव डॉ.विजय खरे (Registrar Dr.Vijay Khare) यांनी याबाबतचे परिपत्रक प्रसिद्ध केले आहे.  येत्या जानेवारी महिन्यापासून सेट परीक्षेसाठी ऑनलाईन परीक्षा अर्ज स्वीकारले जाण्याची शक्यता आहे.

हेही वाचा : सिंहगड इन्स्टिट्यूटचे मारुती नवले यांच्याविरुद्ध फसवणुकीचा गुन्हा

विद्यापीठ अनुदान आयोगाच्या निर्देशानुसार सावित्रीबाई फुले पुणे विद्यापीठाच्या सेट विभागातर्फे महाराष्ट्र व गोवा राज्यातील विद्यार्थ्यांसाठी सेट परीक्षेचे आयोजन केले जाते. नेट परीक्षेप्रमाणेच सेट परीक्षा सुद्धा ऑनलाईन पद्धतीने घ्यावी, अशा सूचना देण्यात आल्या होत्या.परंतु, उपलब्ध कालावधीचा विचार करून विद्यापीठातर्फे एप्रिल महिन्यात होणारी सेट परीक्षा ही ऑफलाइन पद्धतीने घेतली जाणार आहे. मात्र, यापुढील ४० वी सेट परीक्षा ही ऑनलाइन पद्धतीने घेतली जाईल. तसेच या परीक्षेच्या संदर्भातील वेळापत्रक, अभ्यासक्रम व इतर अनुषंगिक माहिती वेळोवेळी विद्यापीठाच्या संकेतस्थळावर प्रसिद्ध केले जाणार आहे, असे विद्यापीठातर्फे प्रसिद्ध करण्यात आलेल्या परिपत्रकात नमूद करण्यात आले आहे.

विद्यापीठाच्या सेट विभागातर्फे सध्या सेट परीक्षेचे प्रश्नसंच तयार करण्याचे काम सुरू असून डिसेंबर महिन्याअखेरपर्यंत ते सुरू राहणार आहे. तयार झालेल्या प्रश्नपत्रिका संचांचा आढावा घेऊन साधारणपणे जानेवारी महिन्यात सेट परीक्षेचे वेळापत्रक व प्रवेश अर्ज स्वीकृतीचा दिनांक प्रसिद्ध केला जाईल, असे विद्यापीठातील अधिकाऱ्याकडून सांगितले जात आहे.