शिक्षणमंत्री महोदय वार्षिक परीक्षेचा संभ्रम दूर करा; कल्पेश यादव

एज्युवार्ता न्यूज नेटवर्क 

राज्य शैक्षणिक संशोधन व प्रशिक्षण परिषदेने (SCERT) प्रसिद्ध केलेल्या वेळापत्रकानुसार राज्यातील सर्व शाळांनी वार्षिक परीक्षा आणि पॅट परीक्षा (Annual Exam and PAT Exam)  घ्याव्यात, असे प्रसिद्धीपत्रक प्रसिद्ध करण्यात आले आहे. मात्र, त्यावर शिक्षक, मुख्याध्यापकांसह पालकांनी सुध्दा आक्षेप घेतला असून, महाराष्ट्र राज्य माध्यमिक व उच्च माध्यमिक मुख्याध्यापक संघाने (Secondary and Higher Secondary Principals' Association) वार्षिक परीक्षांचे नवीन वेळापत्रक प्रसिद्ध (New schedule release) केले आहे. त्यामुळे कोणत्या वेळापत्रकानुसार परीक्षा घेतल्या जाणार याबाबत सध्या अधिक गोंधळाचे वातावरण निर्माण झाले आहे. याकडे राज्याचे शालेय शिक्षणमंत्री दादा भुसे (Education Minister Dada Bhuse) यात लक्ष घालतील का? विद्यार्थी पालकांमधील गोंधळ दूर करतील का?, SCERT आपले वेळापत्रक मागे घेणार ? हा संभ्रम विद्यार्थी व पालकांच्या मनातून दूर करावा, असे आवाहन युवासेना राज्य सचिव कल्पेश यादव (Kalpesh Yadav) यांनी केले आहे. 

येत्या ८ ते २५ एप्रिलदरम्यान परीक्षा घेतल्यास विद्यार्थ्यांना कडक उन्हात घराबाहेर पडावे लागेल. त्या व्यतिरिक्त विद्यार्थ्यांच्या आरोग्यावर परिणाम होईल. तसेच त्यांचे शैक्षणिक नुकसान होईल. पालकांचे गावी जाण्याचे नियोजन कोलमाडेल त्यामुळे त्यावर शिक्षण विभागाने पुनर्विचार करावा, असे निवेदन युवासेनेतर्फे शिक्षण आयुक्त सचिंद्र प्रताप सिंह यांना देण्यात आले आहे. 

राज्य शैक्षणिक संशोधन व प्रशिक्षण परिषद, महाराष्ट्र विभागाने ८ ते २५ एप्रिलदरम्यान परीक्षा घेण्याचे आदेश दिले आहेत. ८ एप्रिलपासून आठवी व नववीच्या, १९ एप्रिलपासून सहावी व सातवीच्या, ९ एप्रिल पासून पाचवीच्या, २२ एप्रिलपासून तिसरी व चौथीच्या तर २३ एप्रिलपासून पहिली व दुसरीच्या परीक्षा घेण्यात येणार आहेत. तर १ मे रोजी निकाल जाहीर करण्याची अंतिम तारीख निश्चित करण्यात आली आहे. तर दुसऱ्या बाजूला मुख्याध्यापक संघाने प्रसिद्ध केलेल्या वेळापत्रकानुसार, ३ ते २४ एप्रिल दरम्यान परीक्षा घेण्यात येणार आहेत. त्यामुळे विद्यार्थी आणि पालकांमध्ये सध्या संभ्रमाचे वातावरण पाहायला मिळत आहे. 
____________________________

शिक्षण आयुक्त सचिंद्र प्रताप सिंह त्यांच्याशी दूरध्वनी द्वारे संवाद साधून यावर मार्ग काढण्याबाबत चर्चा करण्यात आली. त्यांनी सर्व घटकांशी बोलून सकारात्मक निर्णय घेणार असल्याचे स्पष्ट केले आहे. 

कल्पेश यादव, युवासेना राज्य सचिव