बोगस शिक्षक भरती घोटाळ्यांची चौकशी थेट शिक्षण आयुक्तांमार्फत

एज्युवार्ता न्यूज नेटवर्क 

बोगस शालार्थ आयडी (Fake school ID Scam), तसेच मुख्याध्यापकाची नियमबाह्य नियुक्ती, घोटाळ्यासंदर्भात 'एसआयटी' स्थापन करण्याची मागणी जोर धरत आहे. याबाबत शासनाने अद्याप ठोस निर्णय घेतला नसला, तरी मुख्यमंत्री देवेंद्र फडणवीस (Chief Minister Devendra Fadnavis) यांनी या प्रकरणाची गंभीर दखल घेतली आहे. मुख्यमंत्र्यांच्या निर्देशांवरून कक्ष अधिकाऱ्यांनी शिक्षण आयुक्तांना या प्रकरणाची चौकशी (Inquiry through the Education Commissioner) करण्याबाबत पत्र पाठविले आहे. ही चौकशी सहसंचालक दर्जाच्या अधिकाऱ्याकडून करण्याचे स्पष्ट निर्देश देण्यात आले आहेत.

अस्तित्वात नसलेल्या शिक्षकांच्या नावाने बोगस शालार्थ आयडी तयार करण्यात आले होते व अनेक वर्षांपासून पगाराची उचल सुरू होती. सायबर पोलिसांनी एनआयसी, महाआयटी सर्व्हरमधून माहिती मागितली आहे. शालार्थ आयडी तयार करण्याची प्रक्रिया शिक्षण विभागाच्या बाहेरील संगणकातून झाली असल्याचे सायबर पोलिसांच्या तपासातून समोर आले. या प्रकरणाची व्याप्ती शेकडो कोटींमध्ये जाण्याची शक्यता आहे. 

या प्रकरणातील शाळा चालक व शिक्षण विभागातील काही अधिकारी व कर्मचाऱ्यांनी शिक्षण क्षेत्राला भ्रष्टाचाराचे कुरण बनवून शासन, शिक्षक व पालकांची फसवणूक केल्याची बाब स्पष्ट झाली आहे. शिक्षण विभागातील हा घोटाळा नागपूर विभागाएवढाच मर्यादित नसून त्याची व्याप्ती संपूर्ण राज्यभर आहे. ही बाब लक्षात घेता संपूर्ण प्रकरणाची एसआयटी मार्फत चौकशी करण्याची मागणी विधानपरिषद आमदार संदीप जोशी यांनी मुख्यमंत्र्यांकडे केली होती. मुख्यमंत्र्यांनी तपासून कार्यवाही करावी, अशी सूचना शिक्षण विभागाला केली होती. त्यानंतर कक्ष अधिकारी निशा महाजन यांनी शिक्षण आयुक्तांना सखोल चौकशी करण्याचे निर्देश दिले आहेत.