इंजिनिअरिंगच्या ६० हजार जागा रिक्त, महाविद्यालयांसमोर आव्हान

एज्युवार्ता न्यूज नेटवर्क

मागील काही वर्षात इंजिनिअरिंग अभ्यासक्रम प्रवेशाच्या (Engineering course admission) काही जागा शिल्लक राहात असल्याचे निदर्शनास आल्यानंतर राज्य सामाईक प्रवेश परीक्षा (State Common Entrance Examination) कक्षाने या अभ्यासक्रमाच्या फेऱ्यांमध्ये तीन ऐवजी चार असा बदल केला. मात्र, यंदा चार फेऱ्यानंतर देखील प्रवेशाच्या जवळपास ६० हजार जागा रिक्त (60,000 seats in engineering courses are vacant) राहिल्या आहेत. त्यामुळे उर्वरित जागा संस्थात्मक फेरीत भरण्याचे आव्हान महाविद्यालयांसमोर असणार आहे. चार फेऱ्यांअखेर १ लाख ४१ हजार ९०५ विद्यार्थ्यांनी विविध महाविद्यालयांमध्ये प्रवेश निश्चित (Admission of 1 lakh 41 thousand 905 students confirmed) केले आहेत. त्यामध्ये यंदा सर्वाधिक पसंती कॉम्प्युटर आणि त्यासंबंधित अभ्यासक्रमांना विद्यार्थ्यांनी दिले आहे.

पीएसआय परीक्षेत राज्यात पहिली आलेल्या 'आश्विनी केदारी'चा दुर्दैवी मृत्यू

यंदा इंजिनिअरिंग अभ्यासक्रमाच्या २ लाख २ हजार ६३८ जागांसाठी प्रवेश प्रक्रिया सुरू आहे. आतापर्यंत पार पडलेल्या चार फेऱ्यांमध्ये जवळपास १ लाख ४१ हजार ९०५ विद्यार्थ्यांनी प्रवेश निश्चित केले आहेत. तर ६० हजार ७३३ जागा अद्यापही रिक्त आहेत. आता या जागांसाठी संस्थात्मक स्तरावर प्रवेश सुरू असून, त्यामध्ये आणखी काही विद्यार्थ्यांचे प्रवेश होणे अपेक्षित आहे. त्यासाठी विद्यार्थ्यांना १५ सप्टेंबरपर्यंत प्रवेश घेता येणार आहे.

राज्य सामाईक प्रवेश परीक्षा कक्षाने (सीईटी सेल) दिलेल्या आकडेवारीनुसार, यंदा कॉम्प्युटर इंजिनिअरिंग आणि माहिती तंत्रज्ञानाशी संबंधित शाखांकडेच विद्यार्थ्यांचा ओढा कायम आहे. कॉम्प्युटर इंजिनिअरिंगमध्ये सर्वाधिक म्हणजे २२ हजार ९५५ प्रवेश नोंदविले गेले आहेत. या अभ्यासक्रमासाठी ३२ हजार १७१ जागा यंदा आहेत. कॉम्प्युटर सायन्स अॅण्ड इंजिनिअरिंग या शाखेत १९ हजार ८६० जागांपैकी १५ हजार २६३ विद्यार्थ्यांनी प्रवेश घेतला. आयटी अभ्यासक्रमासाठी १७ हजार ३११ जागांपैकी १२ हजार ५२० जागा भरल्या गेल्या आहेत. त्याच जोडीला विद्यार्थ्यांचा आर्टिफिशियल इंटेलिजन्स (एआय), डेटा सायन्स आणि मशीन लर्निंग यांसारख्या आधुनिक शाखांनाही चांगला प्रतिसाद दिसत आहे.

पारंपरिक शाखांकडे विद्यार्थ्यांचा फारसा कल नसल्याचे चित्र आहे. मेकॅनिकल इंजिनिअरिंगच्या २३ हजार ८५३ जागांपैकी १५ हजार २३३ प्रवेश झाले.सिव्हिल इंजिनिअरिंगच्या १७ हजार ४५० जागांपैकी केवळ १० हजार ९३९ विद्यार्थ्यांनीच प्रवेश घेतला आहे. इलेक्ट्रिकल इंजिनिअरिंगमध्ये १३ हजार ६४९ पैकी फक्त ८ हजार ७१४ प्रवेश झाले आहेत.