बारावीनंतर आता दहावीचा पेपर फुटला; गटशिक्षण अधिकाऱ्याला अटक, अमरावतीमधील घटना

एज्युवार्ता न्यूज नेटवर्क 

महाराष्ट्र राज्य माध्यमिक व उच्च माध्यमिक शिक्षण मंडळातर्फे घेतल्या जात असलेल्या इयत्ता बारावीच्या परीक्षेनंतर आता अमरावतीमध्ये इयत्ता दहावीचा पेपर फुटल्याची माहिती समोर आली आहे. याप्रकरणी गटशिक्षण अधिकाऱ्यासह एकाला अटक करण्यात आली आहे. तर दोन कर्मचारी फरार असल्याची माहिती आहे. त्यामुळे पुन्हा एकदा गोपनीय पद्धतीने परीक्षा घेण्याचे आव्हान राज्य शिक्षण मंडळासमोर आहे.

अमरावतीच्या अंजनगाव सुर्जी येथे इंग्रजी विषयाचे दोन पेपर फुटले असल्याची माहिती आहे. यात एक इंग्रजी माध्यमाचा तर दुसरा उर्दू माध्यमाचा पेपर आहे. नागपूर मध्ये इयत्ता बारावीच्या विज्ञान शाखेचे फिजिक्स केमिस्ट्री आणि मॅथेमॅटिक्स विषयाचे पेपर फुटल्याची धक्कादायक माहिती समोर आली होती. रनरद्वारे हे पेपर फुटल्याची शक्यता बोर्डाकडून व्यक्त करण्यात आली. त्यावर याप्रकरणी पोलिसांनी मुख्याध्यापक आणि शिक्षकाला अटक केली आहे. याबाबत राज्य मंडळाकडून चौकशी सुरू असली तरी आता इयत्ता दहावीचा पेपर फुटल्याने पुन्हा एकदा खळबळ उडाली आहे. 

राज्य मंडळांनी कॉपीमुक्त अभियानाचा नारा दिला त्याचप्रमाणे सर्व परीक्षा केंद्रांवर सीसीटीव्ही कॅमेरे बसविण्यात आले मात्र, शाळेच्या कस्टडीत असणारे इयत्ता दहावीचे इंग्रजी विषयाचे पेपर बाहेर गेल्यामुळे चिंता व्यक्त केले जात आहे. अमरावती मधील अंजनगाव सुर्जी येथे घडलेल्या या प्रकाराची आता दखल घेत पुन्हा एकदा राज्य मंडळाला याबाबतची चौकशी करावी लागणार आहे.