दिव्यांग विद्यार्थ्यांना दरमहा २ हजारांची शिष्यवृत्ती, ३१ ऑक्टोंबरपर्यंत करा अर्ज

एज्युवार्ता न्यूज नेटवर्क

पिंपरी चिंचवड महापालिका (Pimpri Chinchwad Municipal Corporation) अंतर्गत येणाऱ्या इयत्ता पहिलीत ते बारावीच्या वर्गात शिक्षण घेणार्‍या दिव्यांग विद्यार्थ्यांना दरमहा २ हजार रुपये शिष्यवृत्ती (2 thousand rupees scholarship per month) देण्याचा निर्णय घेण्यात आला आहे. त्यासाठी विद्यार्थ्यांचे वय हे ६ ते १८ वर्षाच्या दरम्यान असणे अपेक्षित आहे. पिंपरी चिंचवड महापालिकेच्या वतीने दिव्यांग विद्यार्थ्यांसाठी ही शिष्यवृत्ती योजना (Scholarship Scheme for Students with Disabilities) राबवण्यात येत आहे. 

या योजनेसाठी दिव्यांग विद्यार्थी-विद्यार्थिनींना ३१ ऑक्टोंबरपर्यंत अर्ज करता येणार आहेत. पिंपरी चिंचवड महापालिकेचे अधिकृत संकेतस्थळ https://www.pcmcindia.gov.in वर उमेदवार या योजनेसाठी ऑनलाईन अर्ज करू शकतात. महापालिका समाज विकास विभागाच्या दिव्यांग कल्याणकारी योजनेतंर्गत हा लाभ दिला जात असून, पंडित दीनदयाळ उपाध्याय दिव्यांग विद्यार्थ्यांसाठी शिष्यवृत्ती,असे या योजनेचे नाव आहे.

या योजनेचा लाभ घेण्यासाठी अर्जदाराने अर्जासोबत पिंपरी-चिंचवड महापालिका हद्दीतील आधारकार्डची प्रत जोडणे बंधनकारक आहे. अर्जदाराचे आई किंवा वडील यांचे पिंपरी चिंचवड महापालिका हद्दीतील मतदान कार्ड किंवा मतदार यादीची प्रत सोबत जोडावी लागणार आहे. उमेदवाराचे ४० टक्के किंवा त्यापेक्षा अधिक दिव्यांगत्वाबाबतचे शासकीय/महापालिका रुग्णालयाकडील वैद्यकीय प्रमाणपत्र जोडणे गरजेचे आहे. तसेच, मागील वर्षी उत्तीर्ण झालेल्या गुणपत्रिकेची प्रत देखील जोडणे आवश्यक आहे.