प्राध्यापक संघटनेच्या पत्रामुळे नवा ट्विस्ट; 'या' उमेदवाराला दिला जाहीर पाठिंबा, कोणत्या शिक्षक उमेदवाराला बसणार धक्का?

एज्युवार्ता न्यूज नेटवर्क 

पुणे शिक्षक निवडणुकीच्या रणधुमाळीला सुरुवात झाली असून प्राध्यापक संघटनेने पुण्यातील उमेदवाराला जाहीर पाठिंबा दिला आहे. त्यामुळे शिक्षक निवडणुकीत नवा ट्विस्ट आला आहे.पुणे शिक्षक विधानपरिषद निवडणुकीत प्रा. सचिन सानप यांना ‘स्पुक्टो’ने जाहीर पाठिंबा दिला आहे. त्यामुळे राजकीय पक्षांच्या अधिकृत उमेदवारांसाठी ही धोक्याची घंटा असल्याचे मानले जात आहे.

शिक्षक निवडणुकीत भारतीय जनता पक्षाचे अधिकृत उमेदवार कौस्तुभ गावडे महाविकास आघाडीचे उमेदवार जयंत आसगावकर तसेच माजी आमदार दत्तात्रय सावंत यांच्यासह ३० उमेदवार शिक्षक निवडणुकीच्या रिंगणात आहेत. त्यात सचिन सानप हे अपक्ष उमेदवार म्हणून निवडून लढवत आहेत. अपक्ष असून प्राध्यापक संघटनेने सानप यांना पाठिंबा जाहीर केला आहे.

सचिन सानप यांना सावित्रीबाई फुले पुणे विद्यापीठीय व महाविद्यालयीन अध्यापक संघटनेने (स्पुक्टो) जाहीर पाठिंबा घोषित केला आहे. दि. १४ ऑक्टोबर २०२६ रोजी झालेल्या संघटनेच्या कार्यकारिणी सभेत प्रा. सानप यांच्या उमेदवारीला पाठिंबा देण्याचा निर्णय एकमताने घेण्यात आला असून याबाबतचे अधिकृत पत्र प्रसिद्ध करण्यात आले आहे.

गेल्या काही दिवसांपासून सचिन सानप यांना शिवसेनेकडून पाठिंबा मिळत असल्याची चर्चा माध्यमांमध्ये केली जात आहे. एकनाथ शिंदे यांच्या नंदनवन बंगल्यावर याबाबत बैठक झाल्याचे समोर आले होते. त्यानंतर सानप यांचे नाव अधिक चर्चेत आले. पुण्यात शिक्षक व पदवीधर निवडणुकीच्या विविध कार्यक्रमांसाठी दौऱ्यावर असलेले राज्याचे मुख्यमंत्री देवेंद्र फडणवीस यांनाही माध्यमांच्या प्रतिनिधींनी सचिन सानप यांच्याबाबत प्रश्न विचारला होता. त्यात आता प्राध्यापक संघटनेने पाठिंबा दिल्याने शिक्षक निवडणूक सानप यांच्याबाजूने झुकत असल्याचे चित्र दिसून येत आहे.

‘शिक्षकांचा आमदार शिक्षकच असावा’ ही भूमिका केंद्रस्थानी ठेवून प्रा. सानप यांनी पुणे विभाग शिक्षक  निवडणुकीसाठी उमेदवारी अर्ज दाखल केला. शिक्षकांचे विविध प्रश्न, त्यांच्या न्याय्य मागण्या, सेवा-संबंधित समस्या तसेच शिक्षकांच्या हक्कांचे आणि हितांचे विधानपरिषदेत प्रभावी प्रतिनिधित्व होणे आवश्यक आहे. याच व्यापक भूमिकेतून प्रा. सानप यांना पाठिंबा देण्यात येत असल्याचे संघटनेने स्पष्ट केले आहे.

स्पुक्टो संघटनेचे सर्व पदाधिकारी, कार्यकारिणी सदस्य आणि संघटनेचे सदस्य प्रा. सचिन सानप यांना पसंतीक्रमांक १ चे मत देऊन विजयी करण्यासाठी सर्वतोपरी प्रयत्न करतील, असा निर्धार संघटनेने व्यक्त केला आहे.