पुण्यात वैद्यकीय महाविद्यालयाला केंद्राची मंजुरी; MMBS च्या जागा वाढणार

पुणे शहरासाठी आनंदाची बातमी समोर आली आहे. केंद्र सरकारने पुण्यातील बिबवेवाडी येथील ईएसआयसी हॉस्पिटलमध्ये नव्या मेडिकल कॉलेजला मंजुरी दिली आहे. या कॉलेजमध्ये ५० एमबीबीएसच्या जागा असणार आहेत.

Oct 15, 2026 - 09:28

पुण्यात वैद्यकीय महाविद्यालयाला केंद्राची मंजुरी; MMBS च्या जागा वाढणार

एज्युवार्ता न्यूज नेटवर्क

पुणे शहरासाठी आनंदाची बातमी समोर आली आहे. केंद्र सरकारने पुण्यातील बिबवेवाडी येथील ईएसआयसी हॉस्पिटलमध्ये नव्या मेडिकल कॉलेजला मंजुरी दिली आहे. या कॉलेजमध्ये ५० एमबीबीएसच्या जागा असणार आहेत.मुख्यमंत्री देवेंद्र फडणवीस यांनी ही माहिती दिली. त्यामुळे पुणे शहरातील वैद्यकीय शिक्षणाच्या संधींमध्ये वाढ होणार असून शैक्षणिक केंद्र म्हणून पुण्याची ओळख आणखी मजबूत होणार आहे. २०२७-२८ पासून हे कॉलेज कार्यरत होण्याची शक्यता आहे.

यापूर्वी दोनदा ईएसआयसी हॉस्पिटलला मेडिकल कॉलेज म्हणून मान्यता देण्याचा प्रस्ताव पाठवण्यात आला होता. मात्र तो दोन्ही वेळा मेडिकल कौन्सिलकडून नाकारण्यात आला होता. त्यानंतर राज्य सरकारने केंद्रीय मंत्र्यांकडे अपील दाखल केले होते. आता हे अपील स्वीकारण्यात आले आहे. पुण्याचे लोकप्रतिनिधी मुरलीधर मोहोळ, माधुरी मिसाळ आणि चंद्रकांत पाटील यांनी सातत्याने पाठपुरावा केला. त्यांच्या प्रयत्नांमुळेच ही मागणी पूर्ण झाली, असे मुख्यमंत्र्यांनी माध्यमांशी बोलताना सांगितले.

पंतप्रधान नरेंद्र मोदी आणि केंद्रीय आरोग्य व कुटुंब कल्याण मंत्री जे. पी. नड्डा यांनी महाराष्ट्राला नवरात्रीचे हे विशेष भेटवस्तू दिले असल्याचे मुख्यमंत्र्यांनी नमूद केले. केंद्रीय आरोग्य मंत्रालयाने दिलेल्या या मंजुरीमुळे अनेक विद्यार्थ्यांचे एमबीबीएसचे स्वप्न साकार होण्यास मदत होणार आहे. त्याचबरोबर महाराष्ट्रातील डॉक्टरांच्या संख्येतही वाढ होईल. पुणेकरांसाठी ही महत्त्वाची उपलब्धी ठरली आहे.

ही मंजुरी मिळाल्याने पुणे शहरातील वैद्यकीय सुविधा आणि शिक्षण क्षेत्रात नवे पर्व सुरू होणार आहे. विद्यार्थी स्थानिक पातळीवरच गुणवत्तापूर्ण शिक्षण घेऊ शकतील. त्यामुळे बाहेरगावी जाण्याची गरज कमी होईल. मुख्यमंत्र्यांनी या निर्णयाचे स्वागत करताना सांगितले की, पुणे आणि महाराष्ट्रासाठी ही खरोखर आनंदाची बातमी आहे. शैक्षणिक व आरोग्य क्षेत्रात पुढील वाटचाल अधिक सशक्त होईल, असा विश्वास व्यक्त करण्यात आला आहे.