राष्ट्रीय INSPIRE विज्ञान प्रदर्शनात देविका ताडची उल्लेखनीय कामगिरी; देशातील टॉप ६० प्रकल्पांत निवड

एज्युवार्ता न्यूज नेटवर्क 

कासार आंबोली येथील  MES राणी लक्ष्मीबाई मुलींची सैनिक शाळा, कासार आंबोली येथील इयत्ता दहावी ‘अ’ मधील कॅडेट देविका ताड हिने राष्ट्रीय स्तरावर उल्लेखनीय कामगिरी केली आहे. भारत सरकारच्या विज्ञान व तंत्रज्ञान विभागाच्या वतीने आयोजित १२ व्या राष्ट्रीयस्तरीय INSPIRE Award MANAK विज्ञान प्रदर्शनासाठी देशभरातून सहभागी झालेल्या एकूण ७९० प्रकल्पांमधून देविका हिच्या ‘Smart Automatic Official Seal or Stamp Machine’ या प्रकल्पाची देशातील सर्वोत्तम ६० प्रकल्पांमध्ये निवड झाली आहे. या यशाबद्दल नवी दिल्ली येथील भारत मंडपम येथे आयोजित कार्यक्रमात केंद्रीय विज्ञान व तंत्रज्ञान मंत्री डॉ. जितेंद्र सिंह यांच्या हस्ते देविकाचा ‘National INSPIRE Awardee’ म्हणून सन्मान करण्यात आला.

१२ ते १४ ऑक्टोबर २०२६ या कालावधीत भारत मंडपम, नवी दिल्ली येथे हे राष्ट्रीयस्तरीय विज्ञान प्रदर्शन संपन्न झाले. देशभरातील विद्यार्थ्यांनी आपल्या नावीन्यपूर्ण वैज्ञानिक संकल्पना आणि संशोधनाधारित प्रकल्प या प्रदर्शनात सादर केले. या स्पर्धेत देविका हिने सादर केलेल्या स्वयंचलित अधिकृत शिक्का किंवा स्टॅम्प मशीन या प्रकल्पाने लक्षवेधी कामगिरी करत टॉप ६० प्रकल्पांमध्ये स्थान मिळवले.

विद्यार्थ्यांमध्ये वैज्ञानिक दृष्टिकोन, संशोधनवृत्ती, सर्जनशीलता आणि नवकल्पनांना प्रोत्साहन देण्याच्या उद्देशाने INSPIRE Award MANAK हा उपक्रम राबविण्यात येतो. या राष्ट्रीय व्यासपीठावर देविका हिला मिळालेली संधी आणि सन्मान ही प्रशालेसाठी अभिमानाची बाब ठरली आहे.

देविका ताड हिच्या या यशाबद्दल प्रशालेच्या वतीने तिचे अभिनंदन करण्यात येत असून, तिच्या पुढील शैक्षणिक व वैज्ञानिक वाटचालीसाठी शुभेच्छा व्यक्त करण्यात येत आहेत. तिच्या या यशामुळे विद्यार्थिनींमध्ये विज्ञान, तंत्रज्ञान आणि नावीन्यपूर्ण संशोधनाविषयी प्रेरणा निर्माण होण्यास निश्चितच मदत होणार आहे.