काळाचा घाला! संचमान्यतेच्या कामासाठी जाणाऱ्या दोन मुख्याध्यापकांचा अपघाती मृत्यू
वाशीम जिल्ह्यातील शेलूबाजारजवळील तपोवन फाट्याजवळ दोन दुचाकींची समोरासमोर भीषण धडक झाली. या अपघातात कारंजा नगर परिषदेच्या उर्दू प्राथमिक शाळांचे दोन मुख्याध्यापक आणि दुसऱ्या दुचाकीचा चालक अशा तिघांचा मृत्यू झाला. संचमान्यतेच्या कामासाठी वाशीम येथील प्राथमिक शिक्षण अधिकारी कार्यालयाकडे जात असताना काळाने अचानक घाला घातला.
Eduvarta
एज्युवार्ता न्यूज नेटवर्क
वाशीम जिल्ह्यातील शेलूबाजारजवळील तपोवन फाट्याजवळ दोन दुचाकींची समोरासमोर भीषण धडक झाली. या अपघातात कारंजा नगर परिषदेच्या उर्दू प्राथमिक शाळांचे दोन मुख्याध्यापक आणि दुसऱ्या दुचाकीचा चालक अशा तिघांचा मृत्यू झाला. संचमान्यतेच्या कामासाठी वाशीम येथील प्राथमिक शिक्षण अधिकारी कार्यालयाकडे जात असताना काळाने अचानक घाला घातला. या धक्कादायक घटनेमुळे कारंजा शहरातील शैक्षणिक क्षेत्रात शोककळा पसरली आहे.
अपघातात कारंजा नगर परिषद संचालित उर्दू प्राथमिक शाळा क्रमांक १ चे मुख्याध्यापक सैय्यद आबीद हुसैन सैय्यद रऊफ (वय ५६) आणि उर्दू प्राथमिक शाळा क्रमांक २ चे मुख्याध्यापक नाझीम मोहम्मद नूर मोहम्मद (वय ५७) यांचा जीव गेला. त्याचवेळी समोरून येणाऱ्या दुचाकी स्वाराचा देखील मृत्यू झाला. दोन्ही मुख्याध्यापक शाळेच्या संचमान्यतेसाठी कारंजाहून वाशीमला दुचाकीने निघाले होते. तपोवन फाट्याजवळ समोरून वेगाने येणाऱ्या दुचाकीने त्यांच्या वाहनाला जोरदार धडक दिली. या भीषण टक्करीत तिघेही जागीच ठार झाले.
घटनेची बातमी समताच पोलिसांनी तातडीने धाव घेत पंचनामा केला. मृतदेह उत्तरीय तपासणीसाठी मंगरूळपीर ग्रामीण रुग्णालयात पाठवण्यात आले. अपघाताच्या स्थळावरून मिळालेल्या माहितीनुसार दोन्ही मुख्याध्यापक शालेय कामाच्या निमित्ताने प्रवास करत होते.
दोन्ही मुख्याध्यापक कारंजा नगर परिषदेच्या शिक्षण विभागात कार्यरत होते. त्यांच्या अकाली निधनाने शिक्षक वर्गात खूप हळहळ व्यक्त होत आहे. शाळेच्या दैनंदिन कामकाजासाठी प्रवास करताना घडलेल्या या दुर्दैवी घटनेमुळे संपूर्ण शैक्षणिक क्षेत्र दुःखाच्या सावटाखाली आले आहे. कारंजा नगर परिषद आणि स्थानिक नागरिकांमध्ये शोक व्यक्त केला जात आहे. अपघाताची अधिक चौकशी सुरू आहे.
या घटनेने रस्त्यावरील वेगवान वाहतुकीच्या धोक्यांबाबत पुन्हा एकदा इशारा दिला आहे. दोन्ही मुख्याध्यापकांच्या कुटुंबियांना सांत्वन देण्यासाठी अनेक नागरिक आणि सहकारी शिक्षकांनी हजर राहून सहानुभूती दर्शविली. वाशीम जिल्ह्यातील या भीषण अपघाताने कारंजा शहरातील शैक्षणिक वातावरणात दुःखाचा डोंगर कोसळला आहे. पोलिस तपास सुरू असून अपघाताची अचूक कारणे समोर येण्याची अपेक्षा आहे.
