उत्कृष्ट शिक्षक पुरस्कार विजेता अमृत पाटील एमपीएससी पेपरफुटीत आरोपी; मुलीसाठी प्रश्नपत्रिका खरेदीचा धक्कादायक खुलासा
MPSC औषध निरीक्षक प्रश्नपत्रिका फुटीचे प्रकरण: परीक्षा प्रश्नपत्रिका फुटणे आणि कथित आर्थिक व्यवहारांचा तपास सुरू असताना अमृत पाटील यांच्यावर गंभीर आरोप झाले आहेत.
Eduvarta
0
एज्युवार्ता न्यूज नेटवर्क
महाराष्ट्र लोकसेवा आयोगाच्या औषध निरीक्षक पदाच्या परीक्षेतील पेपरफुटी प्रकरणात दररोज नवे आणि धक्कादायक खुलासे समोर येत आहेत. या प्रकरणात प्रेमप्रकरण आणि नंतर झालेले ब्रेकअप हे मुख्य कारण असल्याचे प्राथमिक तपासात दिसून आले आहे. आतापर्यंत अनेक बडे सरकारी अधिकारी, दलाल आणि इतर आरोपींना अटक करण्यात आली आहे. याच पार्श्वभूमीवर आरोपी अमृत पाटील यांच्याबाबत नवी माहिती समोर आली आहे, ज्यामुळे संपूर्ण प्रकरणाला वेगळेच वळण मिळाले आहे.
ऋतुजा पाटीलचे वडील अमृत पाटील यांचा या पेपरफुटीत सर्वात मोठा सहभाग असल्याचे तपासात समोर आले आहे. अमृत पाटील नंदुरबार जिल्ह्यातील परिवर्धा येथील जिल्हा परिषद शाळेत मुख्याध्यापक म्हणून कार्यरत होते. राज्य शासनाने त्यांना उत्कृष्ट शिक्षक पुरस्कारही प्रदान केला होता. मात्र, याच पुरस्कार विजेत्या शिक्षकाने आपल्या मुलीसाठी एमपीएससीची प्रश्नपत्रिका फोडल्याचा गंभीर आरोप समोर आला आहे. त्यांनी नंदुरबार येथील कौटिल्य अकादमीचे संचालक प्रवीण पाटील या दलालाकडून लाखो रुपये देऊन प्रश्नपत्रिका खरेदी केल्याचे उघड झाले आहे.
अमृत पाटील यांनी प्रश्नपत्रिका मिळवल्यानंतर ती केवळ मुलीला दिली की इतरांनाही उपलब्ध करून दिली, याबाबत सध्या तपास सुरू आहे. राज्य शासनाकडून उत्कृष्ट शिक्षक पुरस्कार मिळालेल्या व्यक्तीनेच शिक्षक पदावर कलंक लावल्याचे म्हणत समाजामध्ये संताप व्यक्त होत आहे. या प्रकरणात आणखी काही नावे समोर येण्याची शक्यता तपास यंत्रणांनी वर्तवली आहे.
या प्रकरणातील आणखी एक महत्त्वाचा अँगल म्हणजे ऋतुजा पाटील आणि गौरव पाटील यांच्यातील प्रेमकहाणी. दोघांमध्ये प्रेमसंबंध होते, परंतु ब्रेकअप झाल्यानंतर गौरव पाटील यानेच एमपीएससीकडे पेपरफुटीची तक्रार केली. अमृत पाटील यांनी दलाल प्रवीण पाटील यांची मदत घेऊन पेपर फोडला होता. ऋतुजाने प्रेमापोटी हा पेपर गौरवलाही दिला होता. ऋतुजा परीक्षेत पास झाली होती, पण दोघांमध्ये वाद झाल्यानंतर गौरवने तक्रार दाखल केली.
एकंदरीत, एमपीएससी पेपरफुटी प्रकरणात उत्कृष्ट शिक्षक पुरस्कार विजेत्या अमृत पाटील यांची भूमिका समोर आल्याने संपूर्ण घटनाक्रम अधिक गंभीर झाला आहे. तपास यंत्रणा आता यातील सर्व पैलूंची सखोल चौकशी करत असून, आणखी काही खुलासे होण्याची शक्यता आहे. शिक्षण क्षेत्रातील विश्वासघात आणि परीक्षेच्या पारदर्शकतेवर प्रश्नचिन्ह निर्माण करणाऱ्या या प्रकरणाने महाराष्ट्रात चर्चा सुरू झाली आहे.
