आकाचे आका कोण?: विद्यापीठाची पाकिट संस्कृती केव्हा बंद होणार; अधिसभा सदस्यांचा सवाल

एज्युवार्ता न्यूज नेटवर्क 

सावित्रीबाई फुले पुणे विद्यापीठाच्या (Savitribai Phule Pune University) विविध समित्यांवर त्याच-त्याच सदस्यांना का पाठवले जाते. तसेच काही सदस्य महाविद्यालयाला प्रत्यक्ष भेट न देता केवळ ओटीपी सबमिट करून अहवाल देतात, अशी धक्कादायक माहिती विद्यापीठाच्या अधिसभेत (university assembly) देण्यात आली. त्यामुळे अशा सदस्यांवर काय कारवाई करणार? असा सवाल उपस्थित करण्यात आला. त्याचप्रमाणे अशा सदस्यांना सातत्याने समित्यांवर नियुक्ती करणाऱ्या आकाचे आका कोण? समित्यांवर जाणारे लाडके भाऊ, लाडक्या बहिणी कोण? याची माहिती उपलब्ध करून द्यावी, अशी भूमिका अधिसभा सदस्यांनी घेतली.

सावित्रीबाई फुले पुणे विद्यापीठाच्या आधिसभेची बैठक विद्यापीठाचे कुलगुरू डॉ.सुरेश गोसावी यांच्या अध्यक्षतेखाली शनिवारी सकाळी सुरू झाली. त्यावेळी अधिसभा सदस्य अशोक सावंत यांनी विद्यापीठ समित्यांबाबत स्थगन प्रस्ताव मांडला. समिती सदस्य नियुक्तीवरील स्थगन प्रस्तावावरून अधिसभा सदस्य यांनी विद्यापीठ प्रशासनाला धारेवर धरले. सातत्याने समित्यांवर जाणाऱ्या सदस्यांची नावे जाहीर करावी, अशी मागणी केली. तसेच प्रत्यक्ष महाविद्यालयाला भेट न देता केवळ ओटीपी सबमिट करून अहवाल देणाऱ्या समितीच्या अध्यक्षाचे नाव जाहीर करावे, अशीही मागणी यावेळी करण्यात आली. त्यावर कुलगुरू डॉ. गोसावी यांनी सभागृहाला माहिती दिली जाईल, असे आश्वासन दिले.

अधिसभा सदस्यांचे सभागृह की बैल बाजार

आधिसभा सदस्यांनी विचारलेले प्रश्न नाकारले जातात. हे प्रश्न का नाकारले जातात ? याबाबत अधिसभा सदस्यांनी विद्यापीठ प्रशासनाला जाब विचारला. आधिसभा सदस्य यांना फोन करून सांभाळू घ्यावे, असे सांगितले जाते. ही कोणती पद्धत आहे. ही सिनेट आहे की बैल बाजार आहे? असा सवाल उपस्थित करण्यात आला.