जॉर्जिया,सौदी,कझाकिस्तान,दुबईत उपकेंद्र स्थापनेस विद्यापीठाकडून हिरवा कंदील... 

एज्युवर्ता न्यूज नेटवर्क 

सावित्रीबाई फुले पुणे विद्यापीठाचे (Savitribai Phule Pune University)कतार येथे उपकेंद्र सुरू असून आता विद्यापीठातर्फे जॉर्जिया,दुबई,सौदी, कझाकिस्तान (Georgia, Saudi Arabia, Kazakhstan, Dubai) येथे उपकेंद्र (sub-centre)सुरू करण्याची प्रक्रिया राबवली जाणार आहे. विद्यापीठाच्या व्यवस्थापन परिषदेकडून शनिवारी परदेशात उपकेंद्र सुरू करण्यास हिरवा कंदील देण्यात आला.त्यामुळे लवकरच सावित्रीबाई फुले पुणे विद्यापीठाचा झेंडा (Flag of Savitribai Phule Pune University)इतर चार देशांमध्ये फडकण्याची शक्यता निर्माण झाली आहे. 

पुणे विद्यापीठातर्फे सुमारे तीन वर्षांपूर्वी कतार येथे विद्यापीठाचे उपकेंद्र सुरू करण्यात आले. कतारच्या धर्तीवर विद्यापीठाने इतर ठिकाणी सुद्धा उपकेंद्र सुरू करण्यास सकारात्मकता दर्शविली आहे. काही महिन्यांपूर्वी जॉर्जिया,दुबई, सौदी,कझाकिस्तान यांनी विद्यापीठाचे उपकेंद्र आपल्या देशात सुरू करावे,यासंदर्भात विद्यापीठाकडे पत्रव्यवहार केला होता.त्यानुसार विद्यापीठाने त्यावर सकारात्मक पाऊले उचली आहेत. 

विद्यापीठाच्या व्यवस्थापन परिषदेच्या बैठकीत यावर चर्चा करण्यात आली, या वृत्तास विद्यापीठाच्या व्यवस्थापन परिषदेच्या सदस्या डॉ. ज्योत्स्ना एकबोटे यांनी दुजोरा दिला.तसेच विद्यापीठाला जागतिक पातळीवर घेऊन जाण्याचा व्यवस्थापन परिषदेचा प्रयत्न आहे,त्यामुळे शनिवारी व्यवस्थापन परिषदेच्या बैठकीत जॉर्जिया,दुबई,सौदी,कझाकिस्तान येथे उपकेंद्र सुरू करण्यास मान्यता देण्यात आली. 

------------------------------------

सावित्रीबाई फुले पुणे विद्यापीठाचे उपकेंद्र जॉर्जिया,दुबई,सौदी, कझाकिस्तान येथे सुरू व्हावे,यासाठी संबंधित देशातील अधिकार मंडळांनी विद्यापीठाकडे पत्रव्यवहार केला होता.त्यावर व्यवस्थापन परिषदेच्या बैठकीत शनीवारी सकारात्मक चर्चा करण्यात आली. इंटरनॅशनलायजेशनच्या दृष्टीने विद्यापीठ प्रयत्नशील आहे.आता लेटर ऑफ इंटेंटची प्रक्रिया सुरू केली जाईल. 

- डॉ. सुरेश गोसावी, कुलगुरू, सावित्रीबाई फुले पुणे विद्यापीठ, पुणे

--------------------

सुमारे तीन महिन्यांपूर्वी चारही देशातील कुलगुरू व प्रतिनिधी सावित्रीबाई फुले विद्यापीठात आले होते. त्यावेळी उपकेंद्र सुरू करण्याबाबत प्राथमिक चर्चा झाली होती. विद्यापीठाच्या व्यवस्थापन परिषदेने मान्यता दिल्यामुळे उपकेंद्र सुरू करण्यासंदर्भातील पुढील कार्यवाही करणे आता शक्य होईल. 

डॉ. विजय खरे, संचालक , अंतराष्ट्रीय केंद्र, सावित्रीबाई फुले पुणे विद्यापीठ, पुणे

------------------