धक्कादायक : दहावी, बारावी पासची प्रमाणपत्रे मिळतात ३५ ते ५० हजारांत
काही जणांनी एकत्रित येत या संस्थेच्या संकेतस्थळासारखे संकेतस्थळ २०१९ मध्ये सुरू केले. त्यामाध्यमातून या टोळीने दहावी उत्तीर्णतेचे बनावट प्रमाणपत्र देण्यास सुरूवात केली.
eduvarta@gmail.com 
एज्युवार्ता न्यूज नेटवर्क
राज्यात गाजलेल्या टीईटी (TET) घोटाळ्यांतर आता शिक्षण (Education) क्षेत्रात खळबळ उडवून देणारे रॅकेट समोर आले आहे. बनावट शैक्षणिक प्रमाणपत्र बनविणाऱ्या टोळीने महाराष्ट्र स्टेट ओपन स्कूलसारखे (Maharashtra State Open School) बनावट संकेतस्थळ बनवून सुमारे ७०० जणांना दहावी (SSC) आणि बारावी (HSC) उत्तीर्णतेची बनवाट प्रमाणपत्रे दिल्याचे उघडकीस आले आहे. या टोळीचे राज्यभरात एजंट असून या प्रकरणी पोलिसांनी तिघांना पुण्यातून अटक केली आहे. (Police arrested a gang of fake certificates of 10th, 12th pass)
छत्रपती संभाजीनगर येथे महाराष्ट्र स्टेट ओपन स्कूल ही शैक्षणिक संस्था आहे. काही जणांनी एकत्रित येत या संस्थेच्या संकेतस्थळासारखे संकेतस्थळ २०१९ मध्ये सुरू केले. त्यामाध्यमातून या टोळीने दहावी उत्तीर्णतेचे बनावट प्रमाणपत्र देण्यास सुरूवात केली. आतापर्यंत त्यांनी तब्बल ७०० जणांना दहावी व बारावीचे बनावट प्रमाणपत्र दिल्याचे पोलिसांच्या तपासात उघडकीस आले आहे.
हेही वाचा : बारामतीच्या विद्यार्थिनीने अनुभवला होरपळणाऱ्या मणिपूरचा थरार..
याबाबतची माहिती पुणे पोलिसांच्या गुन्हे शाखेला मिळाल्यानंतर पोलिसांनी बनावट ग्राहक तयार करून सुरूवातीला सांगली येथील संदीप कांबळे यांच्याशी संपर्क साधला. दहावीच्या प्रमाणपत्रासाठी ६० हजार रुपये खर्च येईल, असे त्याने ग्राहकाला सांगितले. त्यानंतर कांबळे याला ३९ हजार रुपये पाठविण्यात आले. उरलेले १६ हजार रुपये घेण्यासाठी कांबळे पुण्यात स्वारगेट परिसरात येणार असल्याचे पोलिसांना समजले.
पोलिसांनी त्यानुसार स्वारगेट परिसरात सापळा रचला. तो ठरलेल्या ठिकाणी पैसे घेण्यासाठी आल्यानंतर पकडण्यात आले. पोलिसांनी त्याच्याकडे अधिक चौकशी केल्यानंतर कृष्णा सोनाजी गिरी, अल्ताफ शेख, सय्यद इम्रान सय्यद इब्राहीम यांची नावे समोर आली. त्यानंतर पोलिसांनी तिघांनाही अटक केली. त्यांनी बनावट प्रमाणपत्रासाठी राज्यात ठिकठिकाणी एजंट नेमल्याचे तपासात स्पष्ट झाले आहे. ज्यांना दहावी किंवा बारावीच्या प्रमाणपत्राची गरज आहे, त्यांच्याशी संपर्क साधत ही टोळी बनावट प्रमाणपत्र देत होती. सुमारे ३५ ते ५० हजार रुपयांत एक प्रमाणपत्र दिले जात होते.
शैक्षणिक बातम्यांचे अपडेट मिळविण्यासाठी व्हॉट्सअप ग्रुपमध्ये सहभागी व्हा.
