तरुणाई पुस्तक वाचत नाही, हा गैरसमज दूर झाला; चंद्रकांत पाटील 

एज्युवार्ता न्यूज नेटवर्क 

'शांतता... पुणेकर वाचत आहे' (Peace... A Punekar is reading) या कार्यक्रमात हजारो तरुण सहभागी झाले आहेत. त्यामुळे तरुण वर्ग पुस्तक वाचत नाही हा गैरसमज आता दूर झाला आहे. आज  शहरभरात (Pune Book Festival 2024) कुठेही जा हजारो लोक पुस्तक वाचताना दिसत आहेत. रिक्षावाले रिक्षा थांबवून पुस्तक वाचत आहेत, पोलिस स्टेशनमध्ये पोलीस पुस्तक वाचत आहेत, महाविद्यालयांतील हजारो तरुण या कार्यक्रमात सहभागी झाले आहेत. पुस्तक वाचल्याने विचारांचे विश्व मोठे होते, असे माजी मंत्री चंद्रकांत पाटील (Chandrakant Patil) म्हणाले. 

राष्ट्रीय पुस्तक न्यास आणि शिक्षण मंत्रालय, सावित्रीबाई फुले पुणे विद्यापीठ, पुणे महापालिका यांच्या सहकार्याने व फर्ग्युसन महाविद्यालयाच्या वतीने  १४ ते २२ डिसेंबर या कालावधीत शहरात भव्य 'पुणे पुस्तक महोत्सवाचे' आयोजन करण्यात येत आहे. त्यानिमित्ताने 'शांतता... पुणेकर वाचत आहे' या कार्यक्रमाचे आयोजित करण्यात आले होते. यावेळी चंद्रकांत पाटील बोलत होते.

या उपक्रमात पुण्यातील सार्वजनिक वाचकही सहभागी झाले होते. या कार्यक्रमाच्या निमित्ताने एक तास वाचनासाठी देत साहित्य संस्कृतीचा जागर करण्यात आला. त्यानंतर आता १४ ते २२ डिसेंबर या कालावधीत फर्ग्युसन महाविद्यालयाच्या मैदानावर पुणे पुस्तक महोत्सव होत आहे. वाचन संस्कृतीचा कुंभमेळा म्हणून प्रसिद्धीस येत असलेल्या या महोत्सवाच्या निमित्ताने 'शांतता.. पुणेकर वाचत आहेत' हा उपक्रम आज बुधवारी दि. दुपारी १२ ते १ या वेळेत संपन्न झाला. या उपक्रमातून साहित्यप्रेमी पुणेकर एक तास वाचनासाठी देत या कार्यक्रमात सहभागी झाले होते. 

या कार्यक्रमाला माजी मंत्री चंद्रकांत पाटील यांच्यासह आमदार हेमंत रासणे, कार्यक्रमाचे आयोजक राजेश पांडे यांच्यासह अन्य मान्यवर उपस्थित होते. पुण्याचा मध्यवर्ती आणि वर्दळीचा भाग म्हणून ओळखल्या जाणाऱ्या आप्पा बळवंत चौक या ठिकाणी हा कार्यक्रम पार पडला. या कार्यक्रमासाठी राज्याचे ग्रंथालय संचालक अशोक गाडेकर यांच्याकडून  सर्व शासकीय व शासनमान्य सार्वजनिक ग्रंथालये, शासनमान्य संशोधन संस्थांच्या ग्रंथालयांना पत्र पाठवून, वाचकांना या उपक्रमात सहभागी होण्याचे आवाहन करण्यात आले होते. 

---------------------------

उच्च शिक्षण संचालनालयात सुमारे 100 अधिकारी - कर्मचाऱ्यांनी केले वाचन

आपली वाचन संस्कृती वृध्दींगत करण्यासाठी, नव्या पिढील वाचनाविषयी जागृती निर्माण करुन वाचनाची गोडी लावण्यासाठी शांतता  . . . पुणेकर वाचत आहेत या उपक्रमामध्ये उच्च शिक्षण संचालनालयाने सहभाग घेतला. पुणे पुस्तक महोस्तवाच्या अनुषंगाने उच्च शिक्षण संचालनालय, पुणे येथील प्रशासकीय कामातील व्यवस्तेतून वेळ काढून उच्च शिक्षण संचालक शैलेंद्र देवळाणकर,सहसंचालक डॉ प्रकाश बच्छाव व वरिष्ठ अधिकारी आणि कर्मचारी अशा सुमारे 100 अधिकारी - कर्मचारी यांनी आपल्या आवडीच्या पुस्तकाचे वाचन केलेले आहे.