शिक्षकांचे खाजगी नंबर SIR साठी उघड! रात्री-अपरात्री येणाऱ्या काॅलमुळे शिक्षिकांमध्ये भितीचे वातावरण

एज्युवार्ता न्यूज नेटवर्क

मतदारयादीच्या विशेष सखोल पडताळणी (SIR) प्रक्रियेत शिक्षकांना नवी डोकेदुखी निर्माण झाली आहे. अर्जांवर शिक्षकांचे वैयक्तिक मोबाईल (Teachers' personal mobile phones) नंबर छापल्याने त्यांना सातत्याने फोन येत आहेत. सकाळी ६ वाजेपासून मध्यरात्रीपर्यंत मतदार, राजकीय कार्यकर्ते आणि अनोळखी व्यक्तींकडून येणारे फोन शिक्षकांना मानसिक त्रास (Teachers troubled by phones) देत असल्याचे मत व्यक्त करण्यात आले आहे. महाराष्ट्र शिक्षक सेनेने (Maharashtra Teachers Army) याबाबत निवडणूक आयोग आणि राज्य सरकारकडे तक्रार करत खाजगी नंबर छापणे तातडीने बंद करण्याची मागणी केली आहे.

SIR कामासाठी नियुक्त शिक्षकांना मतदार नोंदणी, अर्ज आणि नावांच्या चौकशीचे फोन सतत येत आहेत. अनेकदा वर्गात अध्यापन सुरू असताना फोन येत असल्याने शिक्षकांना व्यत्यय येतो. फोन न उचलल्यास संबंधित व्यक्ती अधिकाऱ्यांकडे तक्रार करतात, ज्यामुळे शिक्षकांवर अतिरिक्त दबाव पडतो. विशेषतः महिला शिक्षिकांना रात्री उशिरा येणारे अनोळखी फोन सुरक्षेच्या दृष्टीने धोकादायक ठरत आहेत. यामुळे त्यांच्यात भीतीचे वातावरण निर्माण झाले आहे.

शिक्षक सेनेने स्पष्ट केले की, आधीच SIR कामामुळे अध्यापनाचे तास कमी होत आहेत. त्यात आता वैयक्तिक नंबर उघड करून शिक्षकांना ‘दूरध्वनी सहाय्य केंद्र’ समजणे योग्य नाही. दूरवर नियुक्ती देताना महिला शिक्षकांचा विचार करावा, दबाव टाकणाऱ्या अधिकाऱ्यांवर कारवाई करावी आणि शिक्षकांना सन्मानाने वागवावे, अशी मागणी केली आहे. 

शिक्षक संघटनेच्या म्हणण्यानुसार, संपूर्ण SIR प्रक्रियेचा भार शिक्षकांवर टाकण्याऐवजी स्वतंत्र यंत्रणा उभारणे गरजेचे आहे. सध्याच्या पद्धतीमुळे शिक्षणव्यवस्थेवर विपरीत परिणाम होत आहे. शिक्षकांना निवडणुकीच्या कामात गुंतवून ठेवल्याने मुख्य जबाबदारी अर्थातच अध्यापनाकडे दुर्लक्ष होत आहे.

या प्रकरणी लवकरात लवकर तोडगा काढण्याची शिक्षक सेनेने आग्रही मागणी केली आहे. शिक्षकांच्या खाजगी जीवनात होणारा हा अनावश्यक हस्तक्षेप थांबवावा आणि त्यांना शिक्षण क्षेत्रात पूर्ण क्षमतेने काम करण्याची संधी द्यावी, असे आवाहन करण्यात आले आहे.