SIR कामाच्या तणावामुळे शिक्षकाने उड्डाणपुलावरून उडी मारली; सुसाईड नोट्समध्ये गंभीर आरोप
सुसाईड नोटमध्ये शिक्षकाने लिहिले आहे की, “गेल्या तीन-चार दिवसांपासून अत्यंत तणावात काम करावे लागते आहे. याचा माझ्या आरोग्यावर विपरित परिणाम झाला आहे.” या नोटवर आधारित दिल्ली पोलिसांनी गुन्हा दाखल केला असून, तपास सुरू आहे.
eduvarta@gmail.com 
एज्युवार्ता न्यूज नेटवर्क
दिल्लीतील सरकारी शाळेतील गणित शिक्षक आनंद कुमार सरोहा (Teacher Anand Saroha) ( वय ४५) यांनी मतदार यादी फेरपडताळणी (SIR) मोहिमेतील अतिरिक्त कामाच्या प्रचंड तणावामुळे झाशीची राणी उड्डाणपुलावरून उडी घेऊन आत्महत्या करण्याचा प्रयत्न (Attempted suicide by jumping off a flyover) केला. सुदैवाने ते गंभीर जखमी झाले असून, उपचारानंतर प्रकृती स्थिर आहे. या घटनेने दिल्लीसह देशभरातील शिक्षण क्षेत्रात खळबळ उडाली आहे. शिक्षकाने मागे ठेवलेल्या सुसाईड नोटमध्ये (Suicide note) निवडणूक आयोगाच्या कारभारावर गंभीर आरोप (Allegations against the Election Commission) करण्यात आले आहेत.
आनंद कुमार सरोहा सर्वोदय बाल विद्यालय, ललिता ब्लॉक, शास्त्री नगर येथे शिकवत होते. SIR प्रक्रियेत बीएलओ सुपरव्हायझर म्हणून त्यांच्यावर सदर बझार भागातील १४१ ते १५० मतदान केंद्रांची जबाबदारी सोपवण्यात आली होती. घरोघरी जाऊन मतदार पडताळणी, डेटा अपडेट आणि बीएलओंचा समन्वय साधणे यासारख्या कामांमुळे ते प्रचंड तणावात होते. पिडीत शिक्षकाने मेडिकल लीव्हसाठी केलेल्या विनंतीकडे प्रशासनाने दुर्लक्ष केले आणि कामावर लक्ष केंद्रित करण्याचे सांगण्यात आल्याचा असा आरोप कुटुंबियांनी केला आहे.
सुसाईड नोटमध्ये शिक्षकाने लिहिले आहे की, “गेल्या तीन-चार दिवसांपासून अत्यंत तणावात काम करावे लागते आहे. याचा माझ्या आरोग्यावर विपरित परिणाम झाला आहे.” या नोटवर आधारित दिल्ली पोलिसांनी गुन्हा दाखल केला असून, तपास सुरू आहे. शिक्षकाला प्रथम हिंदूराव रुग्णालयात दाखल करण्यात आले होते. नंतर सेंट स्टिफन रुग्णालयात हलवण्यात आले. सध्या त्यांची प्रकृती स्थिर असल्याचे डॉक्टरांनी सांगितले आहे.
SIR मोहीम देशभरात सुरू असताना अनेक राज्यांमध्ये शिक्षकांवर अतिरिक्त कामाचा भार पडत आहे. बीएलओ म्हणून काम करताना शैक्षणिक कामांपासून दूर जावे लागत असल्याने शिक्षक संघटनांनी विरोध दर्शवला आहे. या घटनेमुळे निवडणूक आयोगाच्या कामाच्या कार्यपद्धतीवर प्रश्न उपस्थित झाले आहेत. शिक्षकांच्या मानसिक आरोग्याकडे दुर्लक्ष होत असल्याचे मत व्यक्त केले जात आहे.
दिल्लीतील या घटनेने महाराष्ट्रासह इतर राज्यांतील शिक्षकांमध्येही चिंता निर्माण केली आहे. SIR मोहिमेत शिक्षकांना दिलासा देण्याची आणि अतिरिक्त कामाचा भार कमी करण्याची मागणी जोर धरत आहे. पोलिस तपासात सुसाईड नोट आणि शिक्षकाच्या कुटुंबीयांच्या जबाबांचा आढावा घेतला जात आहे. या प्रकारामुळे शालेय शिक्षण आणि निवडणूक प्रक्रियेत समन्वय साधण्याची गरज अधोरेखित झाली आहे.
