बी.ए/बी.एससी - बीएड प्रवेश परीक्षेचा अर्ज भरलेल्या विद्यार्थ्यांना मिळणार शुल्क परतावा

एज्युवार्ता न्यूज नेटवर्क

राष्ट्रीय अध्यापक शिक्षक परिषद (National Council of Teachers) यांनी  ४ वर्षीय बी.ए./बीएससी-बीएड (एकात्मिक) अभ्यासक्रम बंद (4-year B.A./B.Sc-B.Ed (Integrated) course closed) करून, ४ वर्षीय एकात्मिक शिक्षक प्रशिक्षण अभ्यासक्रम (ITEP) या अभ्यासक्रमामध्ये परिवर्तीत केला आहे. त्यानुसार, उच्च आणि तंत्रशिक्षण विभागाने (Department of Higher and Technical Education) शैक्षणिक वर्ष २०२५-२६ पासून चार वर्षांच्या बी.ए/बी.एससी-बी.एड (एकात्मिक) अभ्यासक्रमासाठी सामाईक प्रवेश परीक्षा आणि केंद्रीभूत प्रवेश प्रक्रिया राबविण्यात येऊ नये ,असे कळविले आहे. त्यामुळे शैक्षणिक वर्ष २०२५-२६ (Academic year 2025-26) या वर्षात चार वर्षांच्या B.A/B.Sc-B.Ed (एकात्मिक) अभ्यासक्रमाच्या प्रवेश परीक्षेचा भरलेला शुल्क उमेदवारांना परत (Examination fee refund) करण्यात येणार आहे. त्याबाबत लवकरच संकेतस्थळावर स्वतंत्र सूचना प्रदर्शित केली जाणार असल्याची माहिती सीईटी सेलकडून देण्यात आली आहे. 

शैक्षणिक वर्ष २०२५-२६ मध्ये चार वर्षांच्या बी.ए./बी.एससी-बी.एड (एकात्मिक) सीईटी २०२५ अभ्यासक्रमासाठी अर्ज केलेल्या उमेदवारांना "नॅशनल टेस्टिंग एजन्सी" (NTA) द्वारे आयोजित चार वर्षीय एकात्मिक शिक्षक प्रशिक्षण अभ्यासक्रम (ITEP) अभ्यासक्रमाच्या प्रवेशासाठी "राष्ट्रीय सामाईक प्रवेश परीक्षा" "NCET 2025" साठी ऑनलाइन अर्ज भरण्याचा सल्ला देण्यात आला. इच्छुक आणि पात्र उमेदवार अधिकृत संकेतस्थळ https://exams.nta.ac.in/NCET वर जाऊन अर्ज भरू शकतात. 

चार वर्षीय बी.ए./बीएस्सी-बीएड (एकात्मिक) हा अभ्यासक्रम राबविणाऱ्या महाविद्यालयांना चार वर्षीय एकात्मिक शिक्षक प्रशिक्षण अभ्यासक्रम (ITEP) या अभ्यासक्रमामध्ये परावर्तीत होत असल्याबाबत राष्ट्रीय अध्यापक शिक्षा परिषदेकडून कळविण्यात आलेले आहे. त्यानुसार बी.ए./बी.एससी-बी.एड (एकात्मिक) अभ्यासक्रम चालविणाऱ्या महाविद्यालयांना NCTE कडे ITEP साठी अर्ज करण्यासाठी सुचित करण्यात आले आहे.