धावत्या लोकलमधून विद्यार्थिनीला फेकलं बाहेर; पनवेलमधील प्रकार!
तरुणीला ढकलल्यानंतर आरोपी शेख अख्तर याने खांदेश्वर रेल्वे स्थानकातून पळून जाण्याचा प्रयत्न केला. मात्र, डब्यातील महिला प्रवाशांनी रेल्वे पोलिसांना घडल्या प्रकाराची माहिती दिली असल्याने पोलिसांनी त्याला खांदेश्वर स्थानकात ताब्यात घेतले.
eduvarta@gmail.com 
एज्युवार्ता न्यूज नेटवर्क
राज्याची राजधानी मुंबई येथे एक धक्कादायक प्रकार घडल्याचं समोर आलं आहे. पनवेल स्थानकावर (Panvel Crime News) एक माथेफिरू महिलांच्या डब्यात चढला, त्याला जाब विचारल्याने त्याने १८ वर्षीय महाविद्यालयीन तरुणीला (18-year-old college girl) धावत्या लोकलमधून ढकलून (Pushed out of a moving local train) दिले. हा प्रकार पनवेल ते खांदेश्वर स्थानका दरम्यान (Panvel to Khandeshwar station) घडला. त्यामुळे विद्यार्थिनींच्या सुरक्षेचा प्रश्न पुन्हा एकदा ऐरणीवर आला आहे.
हेही वाचा - अखेर MPSC च्या सचिवपदी महेंद्र हरपाळकर यांची नियुक्ती
मिळालेल्या प्राथमिक माहितीनुसार, ज्या विद्यार्थिनीसोबत हा प्रकार घडला आहे ती, तरुणी खारघर येथील एका शिक्षण संस्थेत अभियांत्रिकीचे शिक्षण घेते. महाविद्यालय सुटल्यानंतर तरुणीने पनवेल स्थानकातून फलाट क्रमांक तीनवरून सकाळी आठच्या सुमारास सीएसएमटी गाडी पकडली. यावेळी तिच्यासोबत काही मैत्रीणही होत्या. लोकल सुटण्यापूर्वी शेख अख्तर नवाझ (वय 50) हा माथेफिरू महिलांच्या डब्यात चढला. त्या महिलांच्या डब्यात का चढला? असा जाब महिलांनी विचारला असता तो वाद घालू लागला. रागाच्या भरात त्याने धावत्या लोकलमधून तरुणीला पाठीमागून जोरदार धक्का दिला. त्यामुळे तरुणी लोकलमधून खाली रेल्वे रुळांवर पडली. त्यात ती गंभीर जखमी झाली. या संतापनजक घटनेचा व्हिडिओ आता समोर आला आहे.
तरुणीला ढकलल्यानंतर आरोपी शेख अख्तर याने खांदेश्वर रेल्वे स्थानकातून पळून जाण्याचा प्रयत्न केला. मात्र, डब्यातील महिला प्रवाशांनी रेल्वे पोलिसांना घडल्या प्रकाराची माहिती दिली असल्याने पोलिसांनी त्याला खांदेश्वर स्थानकात ताब्यात घेतले. त्यानंतर पनवेल रेल्वे पोलीस ठाण्यात त्याच्या विरोधात बीएनएस कलम 109 जिवे मारण्याचा प्रयत्न, भारतीय रेल्वे अधिनियम कलम 162 व 138 नुसार गुन्हा दाखल करण्यात आला आहे. आरोपी शेख हा फिरस्ता असून त्याचे कोणीही नातेवाईक नाहीत. प्राथमिक तपासात त्याचे मानसिक संतुलन बिघडल्याचे आढळले असून, त्यातूनच त्याने हे कृत्य केल्याची शक्यता आहे.
