अखेर ३ महिन्यानंतर MPSC च्या सचिवपदी महेंद्र हरपाळकर यांची नियुक्ती 

एज्युवार्ता न्यूज नेटवर्क 

महाराष्ट्र लोकसेवा आयोगाचे (MPSC) तत्कालीन सचिव डाॅ. सुवर्णा खरात (Dr. Suvarna Kharat) यांचा कार्यकाळ संपल्यापासून आत्तापर्यंत हे पद रिक्त होतं. त्यामुळे एमपीएससीचा संपूर्ण कार्यभार वाऱ्यावर होता. काही दिवसांपूर्वी या पदावर अवर जिल्हाधिकारी जगन्नाथ वीरकर यांची प्रतिनियुक्ती केली. पण त्यांनी पदभार स्वीकारण्यास नकार दिला. कोणताही सनदी अधिकारी 'एमपीएससी'च्या सचिव पदाचा काटेरी मुकुट घालण्यास तयार नसल्याने हे पद रिक्त होते. अखेर सामान्य प्रशासन विभागाने महेंद्र उत्तमराव हरपाळकर (Mahendra Uttamrao Harpalkar) यांची एमपीएससीच्या सचिव पदावर नियुक्ती (Appointment to the post of Secretary of MPSC) केली आहे. 

हेही वाचा - 'टीईटी २०२५ उत्तरसूची'वर २७ डिसेंबरपर्यंत नोंदवता येणार आक्षेप

मागील काही परीक्षांचे निकाल पाच ते सहा महिन्यांपासून रखडले तर काही निकाल जाहीर झालेल्या परीक्षांच्या मुलाखतीचा कार्यक्रम जाहीर होण्यास विलंब होत आहे. यामुळे उमेदवार सातत्याने आयोगाकडे विचारणा करत असूनही त्यांच्याकडे काहीच उत्तर नसल्याची माहिती आहे. राज्य सरकार आणि आयोगाच्या अशा ढिसाळपणामुळे स्पर्धा परीक्षार्थीचे प्रचंड नुकसात होत असल्याची ओरड समाजातून येत होती. अखेर आयोगाने महेंद्र उत्तमराव हरपाळकर यांची सचिव पदावर निवड केली. त्यामुळे पुढील काळात आयोगाच्या जाहिराती, परीक्षा, निकाल, मुलाखती आणि नियुक्त्या दिलेल्या मुदतीत होतील, अशी अपेक्षा विद्यार्थ्यांना आहे. 

महेंद्र उत्तमराव हरपाळकर यांची प्रशासकीय कारणास्तव सामान्य प्रशासन विभागाच्या आदेशाद्वारे महेंद्र उत्तमराव हरपाळकर यांची सचिवपदी नियुक्ती केली आहे. महाराष्ट्र लोकसेवा आयोगाकडून २ वर्षाच्या कालावधीसाठी नियुक्ती करण्यात आली आहे. महेंद्र उत्तमराव हरपाळकर, सह सचिव हे ज्या तारखेला प्रतिनियुक्तीच्या पदावर रूजू होतील त्या तारखेपासून प्रतिनियुक्तीच्या सेवेचा प्रारंभ होईल. तसेच ती सेवा ज्या तारखेला ते आपल्या शासकीय पदाचा कार्यभार पुन्हा स्वीकारतील, त्या तारखेला समाप्त होईल, असे कळवण्यात आले आहे.

'एमपीएससी' ही घटनात्मक संस्था असून यामध्ये अध्यक्ष आणि सचिव ही महत्त्वाची पदे आहे. आयोगाच्या परीक्षा, निकाल, शिफारसी, न्यायालयीन प्रकरणे, नवीन नियमावली लागू करणे आदी सर्व जबाबदाऱ्या या सचिवांकडे असतात. तसेच सचिव हे कार्यालयीन प्रमुखही असतात. मात्र, राज्य सरकारमधील अधिकारी सचिवपदाची जबाबदारी घ्यायला उत्सुक नसल्याने दोन महिन्यांपासून हे पद रिक्त होते. या सर्वांचा परिणाम 'एमपीएससी'मधील विविध परीक्षा आणि निकालांवर झाला. त्यामुळे पुढील काळात या सर्व गोष्टींना वेग येणार आहे.