शालार्थ आयडी घोटाळा प्रकरणी छत्रपती संभाजीनगर बोर्डाच्या सचिवांना अटक

एज्युवार्ता न्यूज नेटवर्क 

नागपूर जिल्ह्यातील बोगस शिक्षक भरतीचे प्रकरण (Nagpur bogus teacher recruitment case) सध्या राज्यभर गाजत आहेत. आता या भरती घोटाळा प्रकरणी एका महिला आधिकाऱ्याचे नाव समोर आले असून, त्यांना छत्रपती संभाजीनगर मधून अटक (Arrested from Chhatrapati Sambhajinagar) करण्यात आल्याची माहिती समोर आली आहे. छत्रपती संभाजीनगर येथील माध्यमिक व उच्च माध्यमिक विभागीय शिक्षण मंडळाच्या सचिव वैशाली जामदार (Secretary of the Board of Education Vaishali Jamdar) असे या महिला अधिकाऱ्याचे नाव आहे. 

नागपूर पोलिसांच्या एसआयटी पथकाने छत्रपती संभाजीनगर मधून त्यांना ही अटक करण्यात आली असून त्यानंतर नागपुरात आणण्यात आले आहे. त्यामुळे आता या प्रकरणाची व्याप्ती दिवसागणिक वाढत असल्याचे निष्पन्न झाले आहे. वैशाली जामदार या पूर्वी नागपूर विभागीय शिक्षण उपसंचालक होत्या. त्यांच्या कार्यकाळात नागपूर शिक्षण उपसंचालक कार्यालयाव्दारे बनावट कागदपत्राचे आधारे अपात्र शिक्षकांना पदोन्नती देण्यास मान्यता देण्याचा ठराव करण्यात आला असून आणि शासनाची फसवणूक करण्यात आल्याचे निदर्शनास आले आहे.

याच घोटाळा प्रकरणीची चौकशी करण्यासाठी नियुक्त केलेल्या विशेष तपास पथकाने त्यांना हजर राहण्याची नोटीस दिली होती. मात्र, दिलेल्या वेळेत त्या हजर न राहिल्याने एसआयटी पथकाने छत्रपती संभाजीनगर येथील त्यांच्या निवास स्थानावरून ताब्यात घेतले होते. यानंतर कोर्टातून ट्रान्झिट रिमांड घेऊन त्यांना नागपूर येथे आणण्यात आले आहे. नागपूर जिल्ह्यात खासगी प्राथमिक शाळांमध्ये एक दोन नव्हे तर तब्बल 580 शिक्षकांची बोगस पद्धतीने नियुक्ती करण्यात आल्याचा काळाबाजार उघड झाला आहे. त्यानंतर आता या प्रकरणी कारवाईला वेग आला आहे. 

बोगस शिक्षकांशी संबंधित शालार्थ आयडी म्हणजेच त्यांचा वेतन देण्यासाठीच्या संगणिकृत प्रक्रिये संदर्भात अनेक डिव्हाईस (डेस्कटॉप कम्प्युटर, लॅपटॉप, मोबाईल फोन) वेगवेगळ्या लोकेशन्सवरून वेगवेगळ्या आयपी ऍड्रेसद्वारे वापरले गेल्याचे दिसून येत आहे. तर मोठ्या संख्येने वेगवेगळे लोकेशन्स किंवा आयपी ऍड्रेस किंवा डिवाइस वापरले गेल्याचे प्राथमिक दृष्ट्या दिसून येत आहे. त्यामुळे सायबर सेल समोर या घोटाळ्याचा तपास करणं एक मोठं आव्हान होऊन बसले आहे. या प्रकरणी एकट्या नागपूर विभागात झालेल्या 580 शिक्षक आणि शिक्षकेत्तर कर्मचाऱ्यांच्या नियुक्त्यांची चौकशी सुरू करण्यात आली आहे. हे लोन राज्यभर पसरले असल्याची शंका व्यक्त करण्यात येत आहे.