अविष्कार स्पर्धेत SPPU चा संघ उपविजेता: मिळवली ११ पारितोषिके

 एज्युवार्ता न्यूज नेटवर्क 

संशोधनाला प्रोत्साहन देण्यासाठी राज्यपाल कार्यालयातर्फे आयोजित केल्या जाणाऱ्या आविष्कार स्पर्धेत सावित्रीबाई फुले पुणे विद्यापीठाचा संघ यंदा उपविजेता ठरला आहे. आविष्कार या राज्यस्तरीय स्पर्धेत सावित्रीबाई फुले पुणे विद्यापीठाच्या संशोधक विद्यार्थ्यांनी उत्कृष्ट कामगिरी करत एकूण ११ पारितोषिके पटकावली. विद्यापीठाच्या विद्यार्थ्यांनी १ प्रथम, ६ द्वितीय, २ तृतीय व २ उत्तेजनार्थ पारितोषिके मिळवली आहे.

परभणी येथील वसंतराव नाईक मराठवाडा कृषी विद्यापीठात दिनांक २८ ते ३१ जानेवारी २०२६ दरम्यान ही स्पर्धा आयोजित करण्यात आली होती. यंदा १८ वी महाराष्ट्र राज्य आंतरविद्यापीठीय संशोधन स्पर्धा उत्साहात पार पडली. या स्पर्धेत राज्यातील विविध विद्यापीठांमधील संशोधक विद्यार्थ्यांनी आपल्या संशोधन विषयांचे प्रभावी सादरीकरण केले. मानव्यविद्या, भाषा व ललित कला, वाणिज्य, व्यवस्थापन व कायदा, सायन्स, कृषी व पशुसंवर्धन, अभियांत्रिकी व तंत्रज्ञान, वैद्यकीय व औषधनिर्माणशास्त्र या सहा प्रमुख विषय गटांमध्ये ही स्पर्धा घेण्यात आली. ही स्पर्धा पदवी (UG), पदव्युत्तर (PG) तसेच पोस्ट पीजी (PPG) या तीन स्तरांमध्ये आयोजित करण्यात आली होती.

सावित्रीबाई फुले पुणे विद्यापीठ ‘त्रिंबक माधव चांदे उपविजेता फिरता चषक’ प्राप्त केला असून, विद्यापीठाचा संघ उपविजेता ठरला आहे. या यशाबद्दल कुलगुरू प्रा. डॉ. सुरेश गोसावी, प्र-कुलगुरू प्रा. डॉ. पराग काळकर, आविष्कार समिती अध्यक्ष प्राचार्य डॉ. देविदास वायदंडे तसेच IQAC संचालक प्रा. विनायक जोशी यांनी संपूर्ण संघाचे अभिनंदन करून पुढील संशोधन कार्यासाठी शुभेच्छा दिल्या.

----------

सावित्रीबाई फुले पुणे विद्यापीठाच्या विद्यार्थ्यांनी आविष्कार स्पर्धेत उत्कृष्ट कामगिरी केली असून सर्व विद्यार्थ्यांचे अभिनंदन.अविष्कार स्पर्धेसाठी आयोजित करण्यात आलेल्या विविध समित्यांनी व या समितीमध्ये काम करणाऱ्या सर्व सदस्यांनी घेतलेल्या परिश्रमामुळे हे यश प्राप्त झाले आहे. डॉ.विनायक जोशी, डॉ.देविदास वायदंडे यांच्यासह सर्व आविष्कार टीमचे अभिनंदन.

- डॉ सुरेश गोसावी, कुलगुरू सावित्रीबाई फुले पुणे विद्यापीठ 

------------

विद्यापीठाने अविष्कार स्पर्धेसाठी आवश्यक निधी उपलब्ध करून दिल्यामुळे महाविद्यालयांमधून नाविन्यपूर्ण संशोधन प्रकल्प सादर करण्यास महाविद्यालयांना संधी मिळाली. विद्यापीठाची संलग्न महाविद्यालयातील प्राध्यापकांनी व विद्यार्थ्यांनी घेतलेल्या परिश्रमामुळे विद्यापीठाला उपविजेता प्राप्त झाले. सर्व विद्यार्थ्यांचे अभिनंदन.

डॉ. देविदास वायदंडे, सदस्य, व्यवस्थापन परिषद, सावित्रीबाई फुले पुणे विद्यापीठ