आजपासून ITI प्रवेशासाठी नोंदणी

एज्युवार्ता न्यूज नेटवर्क

नुकतेच दहावीचे निकाल (10th result) लागले आहेत. निकाल जाहीर झाल्यानंतर पुढे करायचं काय असा प्रश्न अनेक विद्यार्थ्यांमध्ये असतो. बरेच विद्यार्थी आयटीआयमध्ये प्रवेश (ITI Admission) घेण्यासाठी इच्छुक असतात. अशा विद्यार्थ्यांसाठी महत्वाची बातमी आहे. आता राज्यातील शासकीय व मान्यताप्राप्त खाजगी औद्योगिक प्रशिक्षण संस्थांमध्ये (आयटीआय) प्रवेश प्रक्रियेला आजपासून सुरुवात झाली आहे.

कौशल्य विकास व उद्योजकता विभागाअंतर्गत (Skill Development and Entrepreneurship Department) असलेल्या व्यवसाय शिक्षण व प्रशिक्षण संचालनालयातर्फे ही प्रवेशाची प्रक्रिया संचालनालयाच्या संकेतस्थळावर उपलब्ध होईल. यंदा प्रवेश अर्ज व नोंदणी शुल्क भरणे, आयटीआय केंद्रांची निवड करणे, प्रवेश अर्जात सुधारणा, दुरुस्ती करणे, हरकती नोंदवणे आदी सर्व कामे विद्यार्थ्यांना ऑनलाईन करता येणार आहेत.

यावर्षी प्रवेशासाठी ४१९ शासकीय आयटीआय मध्ये ९३ हजार व ५८८ अशासकीय आयटीआयमध्ये ६१ हजार अशा एकूण १ लाख ५४ हजार जागांवर प्रवेश निश्चित केले जाणार आहेत.  

एक वर्ष कालावधीचे ४४ अभ्यासक्रम व दोन वर्ष कालावधीचे ३६ अभ्यासक्रम असून या अभ्यासक्रमांसाठी १५ मे २०२५ सकाळी ११.०० वाजतल्यापासून प्रवेश अर्ज ऑनलाईन पद्धतीने  https://admission.dvet.gov.in या संकेतस्थळावर अर्ज भरता येणार आहेत. यानंतर प्रथम फेरीसाठी आपल्या पसंतीचे व्यवसाय व संस्था निवडण्यासाठी आवश्यक ते पर्याय सादर करता येणार आहेत. यासाठी 'ऑप्शन फॉर्म' भरण्यास २६ मे पासून सुरुवात होणार आहे.

दरम्यान, प्रत्येक उमेदवाराने एकच अर्ज भरावा, असे स्पष्ट निर्देश संस्थेमार्फत देण्यात आले आहेत. एका मोबाईल क्रमांकावर केवळ एक अर्ज स्वीकारण्यात येईल. अर्जामध्ये प्राथमिक मोबाईल क्रमांक देणे बंधनकारक असून, त्याच क्रमांकावर ओटीपी व वेळोवेळी प्रवेशासंबंधी माहिती दिली जाणार आहे.