धक्कादायक! गोरेगावात म्युझिक कॉन्सर्टमध्ये ड्रग्जच्या ओव्हरडोसने २ विद्यार्थ्यांचा मृत्यू, एक जखमी 

एज्युवार्ता न्यूज नेटवर्क

मुंबईतील गोरेगाव नेस्को संकुलातील (Goregaon NESCO Complex) लाइव म्युझिक कॉन्सर्टमध्ये धक्कादायक घटना घडली आहे. नेस्को कडून आयोजित लाईव्ह म्युझिक कॉन्सर्टमध्ये (Live Music Concert) सहभागी झालेल्या एका नामांकित कॉलेजच्या एमबीएच्या दोन विद्यार्थ्यांचा मृत्यू (Two Students Die) झाल्याने खळबळ उडाली आहे. मृतांमध्ये एक २८ वर्षीय विद्यार्थी आणि २४ वर्षीय एक विद्यार्थिनीचा समावेश असल्याची माहिती मिळत आहे. आणखी एक २५ विद्यार्थीनीची प्रकृती चिंताजनक असून तिच्यावर अतिदक्षता विभागात (One student seriously injured) उपचार सुरु आहेत. या घटनेमुळे परिसरात खळबळ उडाली असून कॉलेज वर्तुळात भीतीचे वातावरण पसरले आहे. 

मिळालेल्या माहितीनुसार, मुंबईच्या पश्चिम उपनगरातील गोरेगाव परिसरात एका लाईव्ह म्युझिक कॉन्सर्टचे आयोजन करण्यात आले होते. या कार्यक्रमासाठी तीन ते चार हजार तरुण-तरुणींनी गर्दी केली होती. या म्युझिक कॉन्सर्टदरम्यान जास्त प्रमाणात मद्यपान आणि ड्रग्जसह एक्टसी या अंमली पदार्थाच्या गोळ्यांचे सेवन केल्यामुळे काही विद्यार्थ्यांना त्रास झाला. प्रथम त्यांना श्वास घेण्यास त्रास आणि नंतर अस्वस्थ वाटू लागले. त्यांची प्रकृती खालवल्यामुळे यातील 2 तरुणींना मुंबईच्या जोगेश्वरी येथील हिंदू हृदय सम्राट बाळासाहेब ठाकरे ट्रामा केअर रुग्णालयात उपचारासाठी दाखल केले होते.

लाईव्ह म्युझिक कॉन्सर्टमध्ये सहभागी विद्यार्थ्यांनी अमली पदार्थाचे अतिसेवन केल्याची शक्यता वर्तवण्यात आली आहे. मात्र, हा केवळ अंदाज वर्तवण्यात आलेला आहे. मृत्यूचे नेमके कारण वैद्यकीय आणि न्यायवैद्यक अहवाल प्राप्त झाल्यानंतरच निश्चित होईल. मृत व्यक्तीच्या रक्ताचे नमुने तपासणीसाठी पाठवण्यात आले आहेत. वनराई पोलिसांनी मृत विद्यार्थ्यांना ड्रग्ज पुरवल्याचा आरोपाखाली त्यांच्याच दोन मित्रांना अटक केले आहे. तसेच सदोष मनुष्यवधाचा गुन्हा दाखल या घटनेशी संबंधित व्यक्तींसह पाच जणांना अटक केली आहे. यापूर्वी तीन जणांना अटक करण्यात आली होती.