MHT CET 2026: दुसऱ्या संधीच्या नोंदणीसाठी 2 दिवसांची मुदतवाढ
सीईटी सेलकडून विद्यार्थ्यांसाठी काही महत्त्वाच्या सूचना देण्यात आल्या आहेत. ही संधी फक्त त्या उमेदवारांसाठी आहे ज्यांनी प्रारंभिक मुदतीत दुसऱ्या संधीसाठी नोंदणी केली नाही. ज्या विद्यार्थ्यांनी यापूर्वीच दोन्ही संधींसाठी नोंदणी केली आहे, त्यांना पुन्हा अर्ज करण्याची गरज नाही.
eduvarta@gmail.com 
एज्युवार्ता न्यूज नेटवर्क
महाराष्ट्र राज्य सामायिक प्रवेश परीक्षा कक्षाने (State Common Entrance Test) एमएचटी सीईटी २०२६ (MHT CET 2026) साठी दिलासादायक निर्णय घेतला आहे. ज्या विद्यार्थ्यांची दुसऱ्या संधीसाठी (Second Attempt) नोंदणी करण्याची मुदत हुकली आहे, अशा उमेदवारांना ऑनलाइन नोंदणी आणि अर्ज भरण्यासाठी दोन दिवसांची विशेष मुदतवाढ जाहीर (Special Extension Announced) करण्यात आली आहे. ही मुदत १५ एप्रिल २०२६ ते १६ एप्रिल २०२६ पर्यंत राहणार असून, सर्व प्रवर्गांसाठी ५०० रुपये अतिरिक्त विलंब शुल्क भरावे लागेल.
अधिकृत सूचनेनुसार, अभियांत्रिकी, औषधनिर्माणशास्त्र आणि कृषी अभ्यासक्रमांसाठी एमएचटी सीईटी २०२६ आयोजित केली जाणार आहे. प्रारंभिक नोंदणी प्रक्रिया यापूर्वीच पूर्ण झाली आहे. मात्र, अर्जाची मुदत चुकलेल्या उमेदवारांकडून सीईटी कार्यालयाला प्रत्यक्ष भेटून, ई-मेल आणि दूरध्वनीद्वारे अनेक विनंत्या प्राप्त झाल्या. या विनंत्यांचा विचार करून विद्यार्थ्यांच्या भविष्यातील शैक्षणिक नुकसान टाळण्यासाठी ही दोन दिवसांची विशेष मुदत देण्यात आली आहे. दुसऱ्या संधीसाठी घेण्यात येणाऱ्या परीक्षेच्या संभाव्य तारखा जाहीर करण्यात आल्या आहेत. त्यानुसार या परीक्षा १० मे ते १६ मे या कालावधीत घेण्यात येणार आहेत. पीसीबी गटाच्या १० आणि ११ मे रोजी तर पीसीएम गटाची परीक्षा १२ मे ते १६ मे या कालावधीत घेतली जाणार आहे.
सीईटी सेलकडून विद्यार्थ्यांसाठी काही महत्त्वाच्या सूचना देण्यात आल्या आहेत. ही संधी फक्त त्या उमेदवारांसाठी आहे ज्यांनी प्रारंभिक मुदतीत दुसऱ्या संधीसाठी नोंदणी केली नाही. ज्या विद्यार्थ्यांनी यापूर्वीच दोन्ही संधींसाठी नोंदणी केली आहे, त्यांना पुन्हा अर्ज करण्याची गरज नाही. APAAR ID तयार नसलेल्या उमेदवारांनी तातडीने DigiLocker द्वारे तो तयार करणे अनिवार्य आहे. या वाढीव कालावधीत अर्ज भरल्यानंतर एडिटिंगची कोणतीही सुविधा उपलब्ध नसेल. त्यामुळे अर्ज सादर करण्यापूर्वी सर्व माहिती ज्यामध्ये नाव, जन्मतारीख, फोटो, स्वाक्षरी यामध्ये अचूकता असल्याची खात्री करून घ्या. नोंदणी www.mahacet.org किंवा cetcell.mahacet.org या अधिकृत वेबसाइटवर ऑनलाइन करता येणार असल्याचे सांगण्यात आले आहे.
