राष्ट्रीय क्रीडा स्पर्धेचे यजमानपद पुण्याला; एमओएचा आयओएकडे प्रस्ताव

एज्युवार्ता न्यूज नेटवर्क 

पुणे शहराला २०२९ च्या राष्ट्रीय क्रीडा स्पर्धेचे (National Games 2029) यजमानपद मिळावे, यासाठी महाराष्ट्र ऑलिम्पिक असोसिएशनने (एमओए) भारतीय ऑलिम्पिक असोसिएशनकडे (आयओए) अधिकृत प्रस्ताव पाठवला आहे. तसेच राज्याचे मुख्यमंत्री देवेंद्र फडणवीस यांनीही याबाबत आयओएकडे शिफारस केली असून, केंद्राकडेही पाठपुरावा सुरू असल्याची माहिती केंद्रीय राज्यमंत्री व पुण्याचे खासदार मुरलीधर मोहोळ यांनी दिली.

प्रोग्रेसिव्ह एज्युकेशन सोसायटीच्या मॉडर्न कॉलेजमध्ये आयोजितवार्षिक क्रीडा पारितोषिक वितरण समारंभ कार्यक्रमात ते बोलत होते. यावेळी कार्यक्रमास पुण्याच्या प्रथम नागरिक महापौर मंजुषा नागपुरे,भारतीय वर्ल्ड कप खो-खो विजेता संघाचे कर्णधार प्रतीक वाईकर, शिवाजीनगर मतदार संघाचे आमदार सिद्धार्थ शिरोळे संस्थेच्या सहकार्यवाह डॉ.ज्योत्सना एकबोटे, संस्थेचे सचिव शामकांत देशमुख, महाविद्यालयाच्या प्राचार्या डॉ.निवेदिता एकबोटे उपस्थिती होते.

 मुरलीधर मोहोळ म्हणाले, “गेल्या १२ वर्षांत देशातील क्रीडा क्षेत्रात क्रांतिकारी बदल झाले आहेत. क्रीडा बजेटमध्ये मोठी वाढ करण्यात आली असून, सुधारित ‘खेळो इंडिया’ उपक्रमासाठी केंद्राने ३६ हजार ४४० कोटी रुपयांना मंजुरी दिली आहे. खेळाडूंना केवळ त्यांच्या इच्छाशक्तीवर सोडून चालणार नाही, तर त्यांना पायाभूत सुविधा उपलब्ध करून देणे ही सरकारची जबाबदारी आहे. २०३० च्या राष्ट्रकुल स्पर्धा आणि २०३६ च्या ऑलिम्पिक स्पर्धेच्या यजमानपदाचे स्वप्न डोळ्यांसमोर ठेवून सध्या देशात क्रीडा क्षेत्राचा मजबूत पाया तयार केला जात आहे.”

 प्रतीक वाईकर म्हणाले, राष्ट्रीय व राज्यस्तरीय खेळाडूंना शैक्षणिक क्षेत्रात ‘ग्रेस गुण’ (सवलतीचे गुण) मिळायला हवेत. तसेच खेळाडूंना मैदान न सोडता सातत्याने प्रयत्न करण्याचा सल्लाही त्यांनी दिला.

 मंजुषा नागपुरे म्हणाले, तरुणाईला सोशल मीडियाच्या मोहापासून दूर राहण्याचे आवाहन केले. “पाठीवर प्रत्यक्ष थाप मारणारा व्यक्ती हा खरा मित्र असतो, सोशल मीडियावर ‘लाईक्स’ देणारा नाही. तरुणांनी स्क्रीनवरील खोट्या जगातून बाहेर पडून खऱ्या आयुष्याच्या मैदानावर खेळाडू बनले पाहिजे,” असा मोलाचा सल्ला त्यांनी विद्यार्थिनी व खेळाडूंना दिला.

 निवेदिता एकबोटे यांच्या नेतृत्वाखाली मॉडर्न कॉलेज अधिक उज्ज्वल वाटचाल करील, असे नमूद करून सिद्धार्थ शिरोळे म्हणाले,या संस्थेमुळे अनेक लोकांना आधार मिळतो.ही संस्था शिक्षणाच्या माध्यमातून राष्ट्रनिर्माणाचे काम सुरू आहे.

डॉ.ज्योत्सना एकबोटे म्हणाल्या,क्रीडा क्षेत्रात उज्वल यश संपादन केलेल्या यशस्वी खेळाडूंचे अभिनंदन केले.मुरलीधर मोहोळ यांच्याबरोबर महापालिकेत मला काम करता आले, याचा आनंद आहे. असेही त्यांनी सांगितले.

कार्यक्रमाचे प्रास्ताविक डॉ निवेदिता एकबोटे यांनी केले. यावेळी त्यांनी कॉलेजच्या वाटचालीचा आढावा मांडला.