एमपीएससी परीक्षार्थींना मोठा दिलासा! गट-क, गट-ब संयुक्त पूर्व परीक्षेसाठी एक वर्षाची शिथिलता 

एज्युवार्ता न्यूज नेटवर्क 

महाराष्ट्र लोकसेवा आयोगाच्या  (एमपीएससी) स्पर्धा परीक्षेची तयारी करणाऱ्या विद्यार्थ्यांसाठी दिलासा देणारी बातमी समोर आली आहे. आयोगाकडून घेतल्या जाणाऱ्या शासन सेवेतील परीक्षांसाठी विहित कमाल वयोमर्यादेत एक वर्षाची शिथिलता (One year relaxation in maximum age limit) देण्यात आली आहे. त्यामुळे महाराष्ट्र गट-ब (अराजपत्रित) सेवा संयुक्त पूर्व परीक्षा आणि महाराष्ट्र गट-क सेवा संयुक्त पूर्व परीक्षेसाठी (Group-B and Group-C Combined Preliminary Examination) वयोमर्यादा झालेल्या पात्र उमेदवारांना अर्ज भरण्याची संधी मिळणार असून, त्यांना ६ जानेवारीपर्यंत अर्ज भरता येणार (Applications can be submitted until January 6th) आहे. ज्या विद्यार्थ्यांची वयोमर्यादा संपूष्टात आली होती, अशा सर्व विद्यार्थ्यांना यामुळे मोठा दिलासा मिळाला आहे. 

हेही वाचा - UPSC Exam : EPFO ​​परीक्षेचा निकाल जाहीर

एक वेळची विशेष बाब म्हणून वयोमर्यादा ओलांडलेल्या उमेदवारांना संधी देण्याचा निर्णय आयोगाकडून घेण्यात आला आहे. या निर्णयाच्या अनुषंगाने एमपीएससीने प्रसिद्ध केलेल्या महाराष्ट्र गट-ब (अराजपत्रित) सेवा संयुक्त पूर्व परीक्षा २०२४ आणि महाराष्ट्र गट-क सेवा संयुक्त पूर्व परीक्षा २०२४ या निश्चित केलेल्या कमाल संवर्गाच्या जाहिरातींस अनुसरून वयोमर्यादेमध्ये एक वर्षाची शिथिलता देण्यात आली आहे.

राज्यात मागास वर्गासाठी राज्य शासकीय सेवेतील पदांवर नियुक्तीसाठी आरक्षणाची तरतूद करण्यात आली आहे. या अधिसूचनेतील तरतुदीच्या अंमलबजावणीसाठी शासनामार्फत पदसंखेच्या अनुषंगाने आरक्षण नमूद करून सुधारित मागणीपत्रे एमपीएससीला देण्यातआली होती. त्यानुसार एमपीएससीने जाहिराती प्रसिद्ध केल्या होत्या. 

उमेदवारांना २६ डिसेंबर ते ६ जानेवारी या कालावधीत अर्ज करता येणार आहे. ऑनलाइन परीक्षा शुल्क भरण्यासाठी ६ जानेवारी ही अंतिम मुदत आहे. दोन्ही परीक्षांसाठी नव्याने अर्ज सादर करणाऱ्या उमेदवारांना केवळ अमरावती, छत्रपती संभाजीनगर, नागपूर, नाशिक, नवी मुंबई आणि पुणे या जिल्हा केंद्रांवरील परीक्षा उपकेंद्रांवर प्रवेश देण्यात येईल.