शालार्थ आयडी घोटाळा : यवतमाळचे शिक्षणाधिकारी रविंद्र काटोलकर यांना अटक

एज्युवार्ता न्यूज नेटवर्क 

शालार्थ आयडी घोटाळ्याचे (School ID scam) नागपूरात रुजलेले बीज आता संपूर्ण राज्यात बसले आहे. या घोटाळा प्रकरणी आतापर्यंत अनेक उच्च पदस्थ अधिकाऱ्यांना ताब्यात घेण्यात आले आहे. त्यानंतर आता याच प्रकरणात आणखी एक मोठी कारवाई करत यवतमाळ येतील शिक्षणाधिकारी (Yavatmal Education Officer) रविंद्र काटोलकर (Education Officer Ravindra Katolkar) यांना अटक करण्यात आली आहे. नागपुरात प्राथमिक व माध्यमिक शिक्षणाधिकारी असताना त्यांनी बोगस शालार्थ आयडी तयार केल्याचा त्यांच्यावर ठपका ठेवण्यात आला आहे.  त्यांना वर्धा येथून अटक (Arrested from Wardha) करण्यात आली असून सायबर पोलीस ठाण्याच्या पथकाने ही कारवाई केली.

हेही वाचा -  एमपीएससी परीक्षार्थींना मोठा दिलासा! गट-क, गट-ब संयुक्त पूर्व परीक्षेसाठी एक वर्षाची शिथिलता

ऑनलाईन शालार्थ आयडी प्रणालीचा गैरवापर करून अनेक शाळांमध्ये शिक्षक व शिक्षकेतर कर्मचाऱ्यांची भरती करण्यात आली होती. या प्रकरणात विभागीय शिक्षण उपसंचालक कार्यालयातील कनिष्ठ प्रशासन अधिकारी यांच्या तक्रारीवरून सायबर पोलीस ठाण्यात गुन्हा दाखल करण्यात आला होता. याचा तपास राज्यपातळीवरील विशेष तपास पथकाकडून सुरू आहे. या प्रकरणात यवतमाळचे शिक्षणाधिकारी रविंद्र काटोलकर यांची सुरुवातीला चौकशीदेखील झाली होती व त्यांना अटकपूर्व जामीनदेखील मिळाला होता. त्यानंतर आता पुन्हा त्यांना अटक करण्यात आली आहे. त्यामुळे या प्रकरणात आणखीन काय समोर येतंय हे पाहाणे महत्त्वाचं ठरणार आहे. 

रविंद्र काटोलकर २४ डिसेंबर २०२१ रोजी नागपुरात प्राथमिक शिक्षणाधिकारी म्हणून रुजू झाले. २० मार्च २०२२ पर्यंत ते जिल्हा परिषदेत असताना त्यांना अनेक शिक्षण व कर्मचाऱ्यांचे शालार्थ आयडी बनावट असल्याची माहिती होती. परंतु वेतन संबंधात शाळेकडून आलेल्या प्रस्तावाची कुठलीही शहानिशा न करता त्यांचे थकीत वेतन देण्याची प्रक्रिया राबविली. त्यातून त्यांनी शासनाची १२ कोटींपेक्षा अधिक रकमेची शासनाची फसवणूक केल्याच्या प्रकरणी त्यांना अटक करण्यात आली.  शालार्थ आयडी घोटाळ्यातील अटकेतील आरोपींची संख्या आता एकूण २७ वर गेली आहे. यामध्ये तीन शिक्षण उपसंचालक, चार शिक्षणाधिकारी, वेतन अधीक्षक, तीन मुख्याध्यापक, दोन शाळा संचालक यांच्यासह सहायक शिक्षक, सहा लिपीक व कनिष्ठ लिपीकांचा समावेश आहे.