मुंबईतील महाविद्यालयांना मिळेना प्रवेश, १०० पेक्षा अधिक कॉलेजची अवस्था बिकट
मुंबई विद्यापीठाशी जवळपास ९१४ महाविद्यालये संलग्न आहेत. यातील १५ महाविद्यालयांमध्ये २० पेक्षा कमी विद्यार्थी आहेत, तर ३० महाविद्यालयांमध्ये ३० हून कमी विद्यार्थी असल्याचे चित्र आहे. ही बहुतांश महाविद्यालये पारंपरिक अशा आर्टस, कॉमर्स आणि सायन्स शाखेची आहेत.
eduvarta@gmail.com 
एज्युवार्ता न्यूज नेटवर्क
मुंबई विद्यापीठाशी (Mumbai University) संलग्नित असलेल्या शंभरपेक्षा अधिक महाविद्यालयांना प्रवेश मिळत नसल्याचे समोर आले आहे. तब्बल १२८ महाविद्यालय असे तिथे १०० पेक्षा कमी विद्यार्थी (Less than 100 students admitted) संख्या आहे. एका बाजूला महाविद्यालयांना प्रवेश मिळत नसल्याची बिकट अवस्था असताना दुसऱ्या बाजूला नव्या महाविद्यालयांचे (New college permission) पेव सुटत आहे. त्यामुळे महाविद्यालयातील शैक्षणिक गुणवत्तेवर प्रश्नचिन्ह उपस्थित होत आहेत. विद्यापीठाशी संलग्न अनेक महाविद्यालयांची स्थिती विदारक असून, येथे मान्यताप्राप्त प्राध्यापक, प्राचार्य नाहीत तसेच भौतिक व शैक्षणिक सुविधा (Physical and educational facilities) नाहीत. त्याचा परिणाम शैक्षणिक गुणवत्तेवर झाला असून त्यामुळे विद्यार्थ्यांची संख्या घटली असल्याचा अंदाज शिक्षण क्षेत्रातून मांडला जात आहे.
मुंबई विद्यापीठाशी जवळपास ९१४ महाविद्यालये संलग्न आहेत. यातील १५ महाविद्यालयांमध्ये २० पेक्षा कमी विद्यार्थी आहेत, तर ३० महाविद्यालयांमध्ये ३० हून कमी विद्यार्थी असल्याचे चित्र आहे. ही बहुतांश महाविद्यालये पारंपरिक अशा आर्टस, कॉमर्स आणि सायन्स शाखेची आहेत. विद्यापीठातील अधिकृत कागदपत्रांवरून ही बाब समोर आली. यातील अनेक महाविद्यालयांतील अभ्यासक्रमांना १ ते ७ विद्यार्थी असून, त्यातून महाविद्यालयांना अभ्यासक्रम चालविणेही अवघड झाले आहे.
विद्यापीठ महाविद्यालयांना संलग्नता देते. त्यांची गुणवत्ता तपासण्याची जबाबदारीही विद्यापीठाची आहे. मात्र, ही महाविद्यालये विद्यार्थ्यां कोणत्याही शैक्षणिक व भौतिक सोयी सुविधा देऊ शकत नाहीत, याचा गुणवत्तापूर्ण शिक्षणावर परिणाम होत आहे. ज्या महाविद्यालयांमध्ये सोयी सुविधा नसतील, तसेच निकृष्ट दर्जामुळे विद्यार्थी येत नसतील, त्या महाविद्यालयांना मान्यता देऊ नये, तसेच आधीच्या महाविद्यालयांना विद्यार्थी मिळत नसताना विद्यापीठाने आता नवीन महाविद्यालयांना मान्यता देऊ नये, अशी मागणी युवासेनेचे नेते आणि सिनेट सदस्य मिलिंद साटम यांनी केली.
वर्ष २०२४-२५ मध्ये ६५ नव्या महाविद्यालयांची परवानगी मागणारे प्रस्ताव विद्यापीठाला प्राप्त झाले होते. त्यातील ३३ नव्या महाविद्यालयांना विद्यापीठाने परवानगी दिली आहे. तर ९२ महाविद्यालयांना नवीन अभ्यासक्रम अथवा तुकड्या सुरू करण्यासाठी विद्यापीठाकडे परवानगी मागितली होती. त्यातील ५३ महाविद्यालयांना नवीन अभ्यासक्रम अथवा तुकड्या सुरू करण्यासाठी विद्यापीठाने परवानगी दिली आहे.
