गुरुपौर्णिमेनिमित्त बाल शिक्षण मंदिर डेक्कनमध्ये ‘कृतज्ञता निधी अभियानाचा’ शुभारंभ
शाळेचे माजी विद्यार्थी व प्रसिद्ध हृदयरोगतज्ज्ञ डॉ. जगदीश हिरेमठ यांनी विद्यालयाला एक लाख रुपयांचा धनादेश देणगी स्वरूपात प्रदान केला.
Eduvarta
एज्युवार्ता न्यूज नेटवर्क
म. ए. सो. बाल शिक्षण मंदिर, डेक्कन जिमखाना, पुणे येथे गुरुपौर्णिमेनिमित्त आजी-माजी शिक्षक, माजी विद्यार्थी, पालक व विद्यार्थ्यांच्या उपस्थितीत ‘कृतज्ञता निधी अभियानाचा’ शुभारंभ उत्साहात करण्यात आला. गुरूंबद्दल कृतज्ञता व्यक्त करत शाळेशी असलेले ऋण जपण्याचा संदेश या कार्यक्रमातून देण्यात आला.
कार्यक्रमाची सुरुवात मान्यवरांच्या हस्ते महर्षी व्यास यांच्या प्रतिमेचे पूजन करून झाली. यावेळी उपस्थितांनी ‘गुरुने दिला ज्ञानरूपी वसा, आम्ही चालवू हा पुढे वारसा’ हे गीत सामूहिकरित्या सादर केले.
शाळेचे माजी विद्यार्थी व प्रसिद्ध हृदयरोगतज्ज्ञ डॉ. जगदीश हिरेमठ यांनी विद्यालयाला एक लाख रुपयांचा धनादेश देणगी स्वरूपात प्रदान केला. तसेच माजी विद्यार्थी आदित्य जयंत कुलकर्णी यांनी दहा हजार रुपयांची देणगी दिली. माजी विद्यार्थिनी संगीता पुराणिक (सन १९५८-६०) यांनी इयत्ता तिसरीच्या सर्व विद्यार्थ्यांना चित्रकला साहित्य भेट दिले, तर माजी विद्यार्थी सुधीर कऱ्हाडकर यांनी शाळेला आठ फूट उंचीची अॅल्युमिनियम शिडी भेट म्हणून दिली.
या कार्यक्रमाला शाला समिती अध्यक्षा मैत्रेयी देसाई, महामात्रा डॉ. अश्विनी पाटील, माजी शिक्षिका मेधा शिंत्रे, मुख्याध्यापिका मोनिका खेडलेकर, उमा हिरेमठ तसेच माजी विद्यार्थी, शिक्षक, शिक्षकेतर कर्मचारी आणि विद्यार्थी मोठ्या संख्येने उपस्थित होते.
यानंतर आयोजित करण्यात आलेल्या बालसभेत इयत्ता तिसरी व चौथीच्या विद्यार्थ्यांनी गुरु-शिष्यांच्या कथा सादर करून गुरूंचे महत्त्व अधोरेखित केले. तसेच इयत्ता पहिली व दुसरीच्या विद्यार्थ्यांनी संतांच्या कथा सांगून संतपरंपरेचे महत्त्व उलगडले. विद्यार्थ्यांमध्ये गुरूंबद्दल आदर, नम्रता, आज्ञाधारकपणा आणि गुरुनिष्ठा ही मूल्ये रुजविण्यासाठी हा उपक्रम प्रेरणादायी ठरला.
गुरुपौर्णिमेनिमित्त आयोजित करण्यात आलेला हा कार्यक्रम कृतज्ञता, संस्कार आणि सामाजिक बांधिलकीचा संदेश देणारा ठरला.
