बाल शिक्षण मंदिर इंग्रजी माध्यम शाळेत महाकवी कालिदास दिन उत्साहात साजरा

एज्युवार्ता न्यूज नेटवर्क 

महाराष्ट्र एज्युकेशन सोसायटीच्या बाल शिक्षण मंदिर इंग्रजी माध्यम शाळेत १४ जुलै २०२६ रोजी महाकवी कालिदास दिन उत्साहात साजरा करण्यात आला. संस्कृत साहित्यातील महान कवी आणि नाटककार महाकवी कालिदास यांच्या साहित्यसेवेचा गौरव करण्यासाठी दरवर्षी आषाढ महिन्याच्या पहिल्या दिवशी हा दिवस साजरा केला जातो.

याप्रसंगी शाळेच्या सकाळच्या प्रार्थना सभेत इयत्ता आठवी ते दहावीच्या विद्यार्थ्यांनी महाकवी कालिदास यांच्या जीवनकार्यावर आणि संस्कृत साहित्यातील त्यांच्या अमूल्य योगदानावर आधारित विविध कार्यक्रम सादर केले.

इयत्ता दहावी ‘ड’चा विद्यार्थी अद्वैत हाटेकर याने महाकवी कालिदास दिनाचे महत्त्व आणि कालिदास यांच्या साहित्यिक कार्याची माहिती प्रभावीपणे मांडली.

इयत्ता आठवी ‘अ’ची विद्यार्थिनी संहिता भावे हिने ‘भारतदेशः’ हे संस्कृत गीत सादर करून उपस्थितांची दाद मिळवली.

तसेच इयत्ता आठवी ‘ब’च्या विद्यार्थिनी निहिरा केस्कर आणि समृद्धी जावरे यांनी महाकवी कालिदास दिनानिमित्त संस्कृतमधील कथा सादर करून संस्कृत भाषेचे सौंदर्य आणि समृद्ध परंपरा विद्यार्थ्यांसमोर उलगडून दाखवली.

या कार्यक्रमाच्या माध्यमातून विद्यार्थ्यांना महाकवी कालिदास यांच्या साहित्याचा परिचय झाला तसेच संस्कृत भाषेचे महत्त्व आणि भारतीय सांस्कृतिक वारशाची जाणीव अधिक दृढ झाली. विद्यार्थ्यांनी सादर केलेल्या विविध उपक्रमांचे शिक्षकांनी कौतुक करत अशा उपक्रमांमुळे विद्यार्थ्यांमध्ये संस्कृत भाषेबद्दलची आवड आणि साहित्यप्रेम वाढीस लागते, असे मत व्यक्त केले.