खाकीला डाग! प्राचार्याला 'पोस्को'ची धमकी दाखवून पोलिसांनीच उकळली ७ लाखांची खंडणी, ३ पोलिसांना बेड्या

एज्युवार्त न्यूज नेटवर्क 

पुणे शहर पोलीस दलाची मान शरमेने खाली घालवणारी एक धक्कादायक घटना समोर आली आहे. एका महिला प्राचार्याला (Female Principal) पॉक्सो (POCSO) कायद्यांतर्गत गुन्हा दाखल करून अटक करण्याची भीती दाखवत तब्बल 7 लाख रुपयांची खंडणी (Extortion of 7 Lakhs) उकळल्याप्रकरणी एका पोलीस उपनिरीक्षकासह तिघांवर गुन्हा दाखल (Case filed against three people) करण्यात आला आहे. पोलीस आयुक्त अमितेश कुमार (Commissioner Amitesh Kumar) यांनी या प्रकरणात कठोर पावले उचलत मोठी कारवाई केली आहे.

याप्रकरणी गुन्हा दाखल झालेल्यांमध्ये पोलीस उपनिरीक्षक अजित बडे, पोलीस कर्मचारी सुदाम तायडे आणि दामिनी पथकातील 'रील स्टार' सोनाली हिंगे यांचा समावेश आहे. यातील अजित बडे हे सध्या सायबर पोलीस ठाण्यात कार्यरत होते, तर सोनाली हिंगे आणि सुदाम तायडे हे शिवाजीनगर पोलीस ठाण्यात कार्यरत आहेत. विशेष म्हणजे सोनाली हिंगे ही सोशल मीडियावर रील स्टार म्हणून प्रसिद्ध असून ती दामिनी मार्शल म्हणून काम करते.

मिळालेल्या माहितीनुसार, जुलै २०२५ मध्ये प्राचार्य काम करीत असलेल्या महाविद्यालयात हे तीन आरोपी पोलीस गेले. तिथे गेल्यावर अजित बडे तक्रारीची एक प्रिंट प्राचार्यासमोर ठेवतो आणि म्हणतो, तुम्ही एका विद्यार्थीनीला मेट्रो स्टेशनवर बंदुकीचा धाक दाखवून तिला गाडीमध्ये ओढले असल्याची तुमच्या विरोधात तक्रार आली आहे. ही मुलगी १८ वर्षापेक्षा कमी वयाची असल्याने तुमच्यावर पोक्सो कायद्यान्वये गुन्हा दाखल होईल, अशी भिती दाखविली. आपल्याला अटक होईल, संस्थेचे नाव बदनाम होईल, अशी धमकी दिल्याने त्यांच्यावर गुन्हा दाखल होऊ नये, यासाठी त्यांनी मुलीशी बोलून काही होतेय का हे सांगतो, त्यानंतर त्यांच्याकडे १० लाख रुपयांची मागणी करतो. प्राचार्यांनी पैसे देण्यास नकार दिल्यावर बडे याने त्यांना धमकावले. शेवटी प्राचार्यांनी बदनामीच्या भितीने ७ लाख रुपये मुलीच्या शिक्षणासाठी दिले.

ही घटना संबंधित मुलीला समजली तेव्हा, ती पोलीस आयुक्त अमितेश कुमार यांची भेट घेऊन माझ्या नावाखाली एका प्राचार्याकडून पैसे उकळले जात असल्याचे सांगते. त्याचबरोबर आपल्याला पोलिसांनी कसा खोटा अर्ज करायला सांगितले, हे या मुलीने सांगितले. पोलीस आयुक्तांनी याची गंभीर दखल घेऊन चौकशीचे आदेश दिले. गुन्हे शाखेच्या महिला पोलीस अधिकाऱ्यांनी प्राचार्य यांना बोलावून मुलीचा तक्रार अर्ज दाखविला. त्यावेळी प्राचार्य यांनी पोलिसांनी आपल्याकडून कसे पैसे उकळले. याची माहिती दिली. त्याची चौकशी केल्यानंतर बंडगार्डन पोलीस ठाण्यात गुन्हा दाखल करण्याचे आदेश पोलीस आयुक्त अमितेश कुमार यांनी दिले. त्यानुसार गुरुवारी खंडणीचा गुन्हा दाखल करण्यात आला आहे.