राज्यातील २५ हजार विद्यार्थ्यांची वसतिगृहात होणार सोय 

एज्युवार्ता न्यूज नेटवर्क  

राज्याचे सामाजिक न्याय मंत्री (State Minister for Social Justice) म्हणून नुकतीच वर्णी लागलेले संजय शिरसाट (Sanjay Shirsat) सध्या चांगलेच अॅक्शन मोडवर आले आहेत. त्यांनी नुसतीच पुण्यातील बार्टी या संस्थेला भेट देत तेथील अडचणी समजून घेतल्या. राज्याच्या सामाजिक न्याय विभागातील सर्व वसतिगृहांमध्ये विद्यार्थ्यांना अद्ययावत सेवा सुविधा उपलब्ध करून देण्यात येणार आहेत. तसेच २५ हजार विद्यार्थ्यांसाठी नवीन वसतिगृह (New hostel for 25 thousand students) उभारण्यात येणार असल्याचे मत राज्याचे सामाजिक न्याय व विशेष साहाय्य विभागाचे मंत्री संजय शिरसाट यांनी बार्टी संस्थेत व्यक्त केले. 

मंत्री संजय शिरसाट यांनी  नुकताच समाजकल्याण आयुक्त व बार्टी कार्यालयात सामाजिक न्याय व विशेष साहाय्य विभागाचा आढावा घेतला. यावेळी ते बोलत होते. तसेच समाजकल्याण, बार्टीतील अधिकारी व कर्मचाऱ्यांनी प्रामाणिकपणे कर्तव्य पार पाडावे, सामाजिक न्याय विभागाच्या वसतिगृहात असलेल्या विद्यार्थ्यांना देण्यात येणाऱ्या सोयी-सुविधांमध्ये  सुधारणा करुन विद्यार्थ्यांना अधिक चांगल्या पद्धतीने शिक्षण घेता याव्यात, यासाठी सामाजिक न्याय विभागामार्फत विशेष प्रयत्न केले जातील, असा विश्वास यावेळी संजय शिरसाट यांनी व्यक्त केला.

दहा वर्षांपासून बार्टीतील १ हजार २०० कंत्राटी कर्मचाऱ्यांच्या पगारात वाढ झाली नाही. त्या अनुषंगाने पगारवाढीची मागणी कर्मचाऱ्यांनी निवेदनाद्वारे केली असता कंत्राटी कर्मचाऱ्यांची पगारवाढ निश्चितच केली जाईल, असे आश्वासन मंत्री संजय शिरसाठ यांनी दिले. यावेळी बार्टी संस्थेचे महासंचालक सुनील वारे यांनी शिरसाट यांचे स्वागत केले. तर विशेष कार्यकारी अधिकारी अभय देशमुख यांच्यासह बार्टी संस्थेतील अधिकारी व कर्मचारी उपस्थित होते.