हृदयद्रावक घटना! झोक्याच्या दोरीचा गळफास; ९ वर्षांच्या चिमुकलीचा दुर्दैवी मृत्यू

एज्युवार्ता न्यूज नेटवर्क

बीड जिल्ह्यातून हृदय पिळवटून टाकणारी घटना समोर आली आहे. माजलगाव (Majalgaon News) शहरात घरात झोका खेळताना गळ्याला अचानक फास बसून एका नऊ वर्षांच्या  मुलीचा मृत्यू झाल्याची हृदयद्रावक घटना (Heartbreaking Incident) घडली आहे. माजलगावातील खंडोबा मैदान परिसरात ही दुर्दैवी घटना घडली. वृंदा समीर रूद्रवार (Vrinda Rudravar student) असे मृत मुलीचे नाव असून ती अवघी नऊ वर्षांची होती. 

मिळालेल्या माहितीनुसार, आज मंगळवारी दि. ३१ मार्च रोजी भगवान महावीर जयंतीनिमित्त शाळेला सुट्टी असल्याने वृंदा आपल्या लहान बहिणीसोबत घराच्या वरच्या मजल्यावर झोका खेळत होती. यावेळी ती खुर्चीवर चढून झोका पकडण्याचा प्रयत्न करत असताना खुर्ची अचानक खाली कोसळली. त्यामुळे झोक्याची दोरी तिच्या गळ्याभोवती अडकून गळफास बसला. या दुर्दैवी अपघातात चिमुकल्या वृंदाचा जागीच मृत्यू झाला.

दरम्यान, वृंदा जेवणासाठी खाली का आली नाही हे पाहण्यासाठी तिची आई वर गेली असता हा प्रकार उघडकीस आला. मुलीची अवस्था पाहून आईने आक्रोश केला. आवाज ऐकून कुटुंबातील इतर सदस्यही धावत आले. त्यांनी तात्काळ वृंदाला रूग्णालयात दाखल केले; मात्र तोपर्यंत खूप उशीर झाला होता. वृंदा ही ईगलवूड इंग्लिश स्कुलमध्ये दुसरीच्या वर्गात शिक्षण घेत होती. तिच्या आकस्मिक निधनामुळे रूद्रवार कुटुंबावर दुःखाचा डोंगर कोसळला असून संपूर्ण परिसरात शोककळा पसरली आहे.