पुणे विद्यापीठात पावसात उत्तरपत्रिका भिजल्या की रद्दी?

एज्युवार्ता न्यूज नेटवर्क

सावित्रीबाई फुले पुणे विद्यापीठाच्या (Savitribai Phule Pune University) आवरातील प्रश्नपत्रिका भिजल्याचा व्हिडीओ सध्या सोशल मिडियावर व्हायरल (Viral video on social media) होत आहे. अवकाळी पावसामुळे शेकडो उत्तरपत्रिका भिजल्याचे (The answer sheets got soaked in the rain) व्हिडिओमध्ये दर्शवण्यात आले आहे. मात्र, या सर्व उत्तरपत्रिकांचा निकाल आधीच जाहीर झालेला असून, त्यांची मूल्यमापन व पुनर्मूल्यांकन प्रक्रिया पूर्ण झाल्याने त्या विल्हेवाट लावण्यासाठीच बाहेर काढल्या जात असल्याचे स्पष्टीकरण विद्यापीठ प्रशासनाने (University Administration's Clarification) दिले आहे.

विद्यापीठाच्या नियमानुसार, कोणत्याही सत्राचा निकाल लागल्यानंतर तसेच फेरतपासणीची प्रक्रिया पूर्ण झाल्यावर ठराविक कालावधीत उत्तरपत्रिका नष्ट करण्याची प्रक्रिया राबवली जाते. अधिकार मंडळाच्या मान्यतेने सध्या ही प्रक्रिया सुरू असून, संबंधिताना या उत्तरपत्रिका ताब्यात घेऊन त्यांची विल्हेवाट लावण्याचे निर्देश देण्यात आले असल्याचे विद्यापीठाकडून सांगण्यात आले आहे. 

व्हायरल होणारे व्हिडिओत उत्तरपत्रिका रस्त्यावर किंवा उघड्यावर भिजलेल्या पाहून विद्यार्थ्यांसह पालकांनी चिंता व्यक्त केली होती. मात्र, या सर्व उत्तरपत्रिका 'रद्दी' किंवा 'निकाली काढण्याच्या' प्रक्रियेतील असल्याने कोणत्याही विद्यार्थ्याचे शैक्षणिक नुकसान होणार नाही, असे प्रशासनाने स्पष्ट केले आहे.

या सर्व उत्तरपत्रिकांचे मूल्यमापन आणि पुनर्मूल्यांकन यांसारख्या सर्व आवश्यक प्रक्रिया आधीच पूर्ण झालेल्या आहेत. नियमानुसार त्या निकाली काढण्यासाठी संकलित करण्यात आल्या होत्या. ही केवळ प्रक्रियात्मक विल्हेवाट लावण्याची कार्यवाही सुरू असताना पावसामुळे त्या भिजल्या आहेत, अशी माहिती परीक्षा व मूल्यमापन मंडळाचे प्रभारी संचालक प्रा. डॉ. प्रभाकर देसाई यांनी दिली आहे.