विमलाबाई गरवारे प्रशालेत गुरुपौर्णिमा उत्साहात साजरी

एज्युवार्ता न्यूज नेटवर्क 

महाराष्ट्र एज्युकेशन सोसायटीच्या सौ. विमलाबाई गरवारे प्रशालेमध्ये गुरुपौर्णिमा अत्यंत उत्साहपूर्ण आणि संस्कारमय वातावरणात साजरी करण्यात आली. महर्षी वेदव्यास यांच्या प्रतिमेचे पूजन करून कार्यक्रमाची सुरुवात करण्यात आली. संपूर्ण सभागृहात गुरुंबद्दलचा आदर आणि कृतज्ञतेचा भाव अनुभवायला मिळाला.

कार्यक्रमाच्या प्रारंभी तिजारे सर यांच्या तबल्याच्या सुरेल साथीने आणि पोतदार सर यांच्या पेटीच्या संगीतावर विद्यार्थ्यांनी भावपूर्ण 'गुरुस्तवन' सादर केले. यानंतर विद्यार्थ्यांनी आपल्या शिक्षकांप्रती कृतज्ञता व्यक्त करण्यासाठी त्यांना श्रीफळ तसेच तुळशीची व विविध फुलझाडांची रोपे भेट देऊन सन्मानित केले. वृक्षारोपणाचा आणि पर्यावरण संवर्धनाचा संदेश देणारा हा उपक्रम उपस्थितांचे लक्ष वेधून घेणारा ठरला.

यावेळी प्रशालेच्या शिक्षिका सौ. केशर जाधव यांनी विद्यार्थ्यांना गुरुपौर्णिमेचे महत्त्व समजावून सांगितले. महर्षी वेदव्यास यांच्या महान कार्याचा उल्लेख करत त्यांनी भारतीय ज्ञानपरंपरेत गुरुचे स्थान सर्वोच्च असल्याचे स्पष्ट केले.

आपल्या मनोगतात त्या म्हणाल्या, "आजच्या विज्ञान आणि तंत्रज्ञानाच्या युगात मोबाईल, संगणक आणि इंटरनेट ही साधने माहिती मिळवण्यासाठी उपयुक्त असली, तरी विद्यार्थ्यांच्या जीवनाला योग्य दिशा देणारे, संस्कार घडविणारे आणि व्यक्तिमत्त्व विकसित करणारे आई-वडील व शिक्षक हेच खरे पहिले गुरु आहेत. विद्यार्थ्यांनी आधुनिक तंत्रज्ञानाचा सुयोग्य वापर करतानाच गुरुजनांचा आदर राखला पाहिजे."

या कार्यक्रमास शाळेतील सर्व शिक्षक, शिक्षकेतर कर्मचारी आणि विद्यार्थी मोठ्या संख्येने उपस्थित होते. कार्यक्रमाची सांगता अत्यंत उत्साहात आणि भक्तिमय वातावरणात झाली.