सातवीच्या चिमुकलीवर सामूहिक बलात्कार; नग्न फोटो-व्हिडिओचा खंडणी सापळा

एज्युवार्ता न्यूज नेटवर्क 

शिक्षणाच्या वयात असलेल्या एका सातवीत शिकणाऱ्या अल्पवयीन मुलीवर दोघा भावांनी नशेचे औषध पाजून सामूहिक बलात्कार केल्याची धक्कादायक घटना छत्रपती संभाजीनगर शहरात उघडकीस आली आहे. आरोपींनी मुलीचे नग्न फोटो व व्हिडिओ काढून तिच्या कुटुंबीयांना पाठवत खंडणीची मागणी केली. याप्रकरणी उस्मानपुरा पोलिसांनी दोन्ही आरोपींना अटक केली असून पोक्सो कायद्यानुसार गुन्हा दाखल करण्यात आला आहे.

पोलिसांनी दिलेल्या माहितीनुसार, आरोपी कृष्णा सोळुंके आणि किशोर सोळुंके हे भावंड आहेत. पीडित मुलगी आणि आरोपी यांच्यात पूर्वी ओळख होती. आरोपींनी मुलीला आपल्या रूमवर नेले, नशेचे औषध पाजले आणि दोघांनी आळीपाळीने तिच्यावर अत्याचार केला. त्यानंतर तिचे नग्न फोटो आणि व्हिडिओ बनवून जवाहरनगर येथे राहत असलेल्या तिच्या आत्याला पाठवले. हे आरोपी एवढ्यावरच थांबले नाहीत त्यांनी “व्हिडिओ व्हायरल करू” अशी धमकी देत खंडणी मागितल्याचा देखील आरोप करण्यात आला आहे. 

प्रकरण प्रथम जवाहरनगर पोलिस ठाण्यात आले. पोलिस निरीक्षक सचिन कुंभार यांच्या मार्गदर्शनाखाली पोलिस अंमलदार मारोती गोरे यांनी आरोपींचा शोध घेत टीव्ही सेंटर भागातील एका बारमधून दोन्ही आरोपींना ताब्यात घेतले. घटना उस्मानपुरा पोलिस ठाण्याच्या हद्दीत घडल्याने दोन्ही आरोपींना उस्मानपुरा पोलिसांच्या ताब्यात देण्यात आले. पोलिस निरीक्षक संग्राम ताठे यांनी गुन्हा दाखल करून आरोपींना न्यायालयात हजर केले. पुढील तपास सुरू आहे.

ही घटना केवळ एका गुन्ह्याची नाही, तर मुलींच्या शिक्षणाच्या अधिकारावर होणाऱ्या हल्ल्याची आहे. सातवीत शिकणारी मुलगी ही भविष्यातील डॉक्टर, इंजिनिअर, शिक्षक, वकिल किंवा उद्योजक बनण्याचे स्वप्न उराशी बाळगत शिक्षणासोबत आपल्या आयुष्य घडवत असते. मात्र, अशा घटनांमुळे मुलींच्या मनात भीतीचे वातावरण निर्माण होते. अनेक पालक मुलींना शाळेत पाठवण्यास घाबरतात. परिणामी मुली शिक्षणामध्ये मागे पडतात.