नर्सिंग सीईटी प्रवेश परीक्षेचा निकाल जाहीर; राज्यातील ४ विद्यार्थ्यांना १०० पर्सेंटाईल
नर्सिंग सीईटीमध्ये ठाणे येथील सरिता विलास घोलप, नागपूर येथील ख्रिस्टीना आशिष जाकोब, बीड येथील शिवराज लक्ष्मण शेळके आणि ठाणे येथील सियोना शाजी वल्लूपारा यांनी १०० पर्सेंटाईल गुण मिळवले.
eduvarta@gmail.com 
एज्युवार्ता न्यूज नेटवर्क
महाराष्ट्र राज्य सामाईक प्रवेश परीक्षा (CET) कक्षातर्फे शैक्षणिक वर्ष २०२६-२७ साठी घेण्यात आलेल्या बीएस्सी नर्सिंग आणि जनरल नर्सिंग अँड मिडवायफरी (GNM) अभ्यासक्रमांच्या प्रवेशासाठीच्या नर्सिंग सीईटी परीक्षेचा निकाल गुरुवारी जाहीर करण्यात आला. या परीक्षेत राज्यातील चार विद्यार्थ्यांनी १०० पर्सेंटाईल गुण मिळवत यश संपादन केले आहे.
सीईटी कक्षाने विद्यार्थ्यांच्या लॉगिनमध्ये निकाल उपलब्ध करून दिला असून प्रवेश प्रक्रियेला लवकरच सुरुवात होणार असल्याची माहिती देण्यात आली आहे.नर्सिंग सीईटीमध्ये ठाणे येथील सरिता विलास घोलप, नागपूर येथील ख्रिस्टीना आशिष जाकोब, बीड येथील शिवराज लक्ष्मण शेळके आणि ठाणे येथील सियोना शाजी वल्लूपारा यांनी १०० पर्सेंटाईल गुण मिळवले. विशेष म्हणजे हे सर्व विद्यार्थी महाराष्ट्रातील असून इतर राज्यांतील एकाही विद्यार्थ्याला १०० पर्सेंटाईल मिळालेले नाही.
खुल्या प्रवर्गात ख्रिस्टीना आशिष जाकोब (नागपूर) आणि सियोना शाजी वल्लूपारा (ठाणे) यांनी १०० पर्सेंटाईल मिळवले. ओबीसी प्रवर्गात सरिता विलास घोलप (ठाणे) आणि शिवराज लक्ष्मण शेळके (बीड) यांनी १०० पर्सेंटाईल मिळवून अव्वल स्थान पटकावले.एससी प्रवर्गात ईश्वरी दत्तात्रय कांबळे (सोलापूर) आणि वेदांश शहाजी वानखेडकर (धुळे) यांनी ९९.९९ पर्सेंटाईल, एसटी प्रवर्गात प्रियाळ (गडचिरोली) यांनी ९९.६२ पर्सेंटाईल, तर एसईबीसी प्रवर्गात सानिका धनाजी इलागे (कोल्हापूर) यांनी ९९.९९ पर्सेंटाईल मिळवले.
नर्सिंग सीईटी परीक्षा ६ आणि ७ मे २०२६ रोजी तीन सत्रांमध्ये संगणकाधारित (CBT) पद्धतीने घेण्यात आली होती. या परीक्षेसाठी एकूण ४७ हजार ७२२ विद्यार्थ्यांनी नोंदणी केली होती. त्यापैकी ४३ हजार २८३ विद्यार्थ्यांनी प्रत्यक्ष परीक्षा दिली. यामध्ये ११ हजार ०२८ विद्यार्थी आणि ३२ हजार २५५ विद्यार्थिनींचा समावेश असून एकूण उपस्थिती ९०.७० टक्के होती.
परीक्षेला बसलेल्या विद्यार्थ्यांपैकी ४३ हजार ७ विद्यार्थी महाराष्ट्रातील तर २७६ विद्यार्थी इतर राज्यांतील होते. राज्यातील ३६ जिल्ह्यांमधील ११६ परीक्षा केंद्रांवर ही परीक्षा घेण्यात आली. यावर्षी महाराष्ट्राबाहेरील कोणत्याही केंद्रावर परीक्षा आयोजित करण्यात आली नव्हती.
पर्सेंटाईल आणि टक्केवारीतील फरक
सीईटी परीक्षेचा निकाल टक्केवारीऐवजी पर्सेंटाईलमध्ये जाहीर केला जातो. टक्केवारी म्हणजे विद्यार्थ्याला एकूण गुणांपैकी मिळालेला हिस्सा, तर पर्सेंटाईल हे इतर विद्यार्थ्यांच्या तुलनेत संबंधित विद्यार्थ्याचे स्थान किंवा रँकिंग दर्शवते. त्यामुळे विद्यार्थ्यांनी निकाल पाहताना टक्केवारीपेक्षा पर्सेंटाईलकडे लक्ष देणे आवश्यक असल्याचे सीईटी कक्षाने स्पष्ट केले आहे.
