फर्ग्युसन कॉलेजच्या अकरावी प्रवेशाच्या जागा वाढल्या; दोन अतिरिक्त तुकड्यांना मंजुरी 

एज्युवार्ता न्यूज नेटवर्क 

डेक्कन एज्युकेशन सोसायटीच्या (Deccan Education Society) फर्ग्युसन कनिष्ठ महाविद्यालयात (Ferguson Junior College) इयत्ता अकरावीसाठी दोन अतिरिक्त तुकड्यांना शालेय शिक्षण व क्रीडा विभागाने मंजुरी दिल्याची माहिती प्राचार्य डॉ. श्याम मुडे (Principal Dr. Shyam Mude) यांनी कळविली आहे. त्यामुळे फर्ग्युसन कॉलेजमध्ये प्रवेश घेण्याची इच्छा असणाऱ्या गुणवंत विद्यार्थ्यांची प्रवेशाची संधी वाढली आहे.

राज्याच्या शालेय शिक्षण विभागातर्फे अकरावी प्रवेशासाठी ऑनलाईन प्रवेश प्रक्रिया राबवली जात आहे. दहावी उत्तीर्ण झालेल्या बहुसंख्य विद्यार्थ्यांची अकरावी प्रवेशासाठी फर्ग्युसन कॉलेजला पसंती असते. अकरावी प्रवेशाची पहिली फेरी संपली असून आता दुसऱ्या फेरीसाठी विद्यार्थ्यांकडून पसंतीक्रम भरून घेतले जात आहेत.या जागा वाढल्याने अनेक विद्यार्थ्यांना फर्ग्युसन कॉलेजची निवड करता येणार आहे. 

फर्ग्युसन कॉलेजला इयत्ता अकरावीसाठी कला आणि विज्ञान शाखांच्या इंग्रजी माध्यमासाठी स्वयंअर्थसहाय्यीत तत्वावर प्रत्येकी एक नवीन तुकडी मिळाली आहे. आता फर्ग्युसनमध्ये विज्ञान विभागाच्या आठ आणि कला विभागाच्या चार तुकड्या झाल्या आहेत. नवीन तुकड्यांमध्ये प्रत्येकी 120 विद्यार्थ्यांना प्रवेश दिला जाणार आहे.

इयत्ता अकरावीचे प्रवेश केंद्रीय प्रवेश पद्धतीने केले जात आहेत. दुसऱ्या फेरीसाठी प्राधान्यक्रम ठरविण्याची शिक्षण विभागाने काही दिवस मुदत दिली आहे. विद्यार्थी आणि पालकांना त्या प्रमाणे महाविद्यालयाचे प्राधान्यक्रम ठरवता येतील,असे फर्ग्युसन कॉलेज प्रशासनाकडून कळवण्यात आले आहे.