परीक्षेत विद्यार्थ्यांकडून जप्त केलेल्या 10 वर्षापासूनच्या मोबाईल, इलेक्ट्रॉनिक गॅजेटची विल्हेवाट

एज्युवार्ता न्यूज नेटवर्क 

सावित्रीबाई फुले पुणे विद्यापीठाशी (Savitribai Phule Pune University) संलग्न असणाऱ्या शैक्षणिक संस्थांमधील (Educational Institute) विद्यार्थ्यांनी परीक्षेदरम्यान केलेल्या गैरप्रकारात आढळून आलेल्या मोबाईल, स्मार्ट वॉच व इलेक्ट्रॉनिक गॅजेट (Mobile phones, smart watches and electronic gadgets found during the exam) यांची विल्हेवाट (Disposal) लावली जाणार आहे. 2013 ते 2023 परीक्षांच्या दरम्यान या वस्तू जमा करण्यात आल्या आहेत. पुढील 15 दिवसात विद्यार्थ्यांनी (students) ओळख दाखवून आपल्या वस्तू घेऊन जाव्यात, असे परिपत्रक विद्यापीठातर्फे प्रसिद्ध करण्यात आले आहे. 

पुणे विद्यापीठाची संलग्न असणाऱ्या अहिल्यानगर ,नाशिक व पुणे जिल्ह्यातील सुमारे साडे सात लाख विद्यार्थी विविध विषयांच्या परीक्षा देतात. या परीक्षा देताना काही विद्यार्थी इलेक्ट्रॉनिक गॅजेट चा वापर करून परीक्षेत गैरप्रकार करताना आढळून येतात. अशा विद्यार्थ्यांचे मोबाईल, स्मार्टफोन आणि इलेक्ट्रॉनिक गॅझेट महाविद्यालयाच्या माध्यमातून जप्त करून विद्यापीठाच्या दक्षता समितीकडे सादर करण्यात आले आहेत. संबंधित वस्तू विद्यार्थ्यांनी घेऊन जाव्यात, याबाबत अनेक वेळा विद्यार्थ्यांना पत्राद्वारे व दूरध्वनीद्वारे संपर्क साधून कळविण्यात आले आहे. परंतु, या वस्तू विद्यार्थी घेण्यासाठी येत नसल्याचे दिसून आले आहे. अखेर विद्यापीठाने या संदर्भातील परिपत्रक प्रसिद्ध केले आहे.

विद्यापीठाच्या परीक्षा व मूल्यमापन मंडळ विभागाचे संचालक यांनी यासंदर्भात जाहीर प्रकटन प्रसिद्ध केले आहे. त्यानुसार परीक्षा विभागात 2013 ते 2023 या परीक्षेदरम्यान विद्यार्थ्यांकडे गैरप्रकार करताना आढळून आलेल्या वस्तू जमा झाल्या आहेत. या वस्तू परीक्षा गैरप्रकार समितीची कार्यवाही पूर्ण झाल्यानंतर दंड भरणा करून परत दिल्या जातात. मात्र, अनेक वेळा विद्यार्थ्यांना संपर्क साधूनही विद्यार्थी या वस्तू घेऊन जात नाहीत. त्यामुळे प्रकटन प्रसिद्ध झाल्यापासून पंधरा दिवसांच्या आत विद्यार्थ्यांनी या वस्तू घेऊन जाव्यात. अन्यथा सावित्रीबाई फुले पुणे विद्यापीठ कायद्यातील तरतुदीनुसार संबंधित वस्तूंवर योग्य ती कार्यवाही केली जाईल, असे या प्रकरणात नमूद करण्यात आले आहे.