राज्यपाल नियुक्त सदस्य गजानन सानप यांची हकालपट्टी करण्याची मागणी 

एज्युवार्ता न्यूज नेटवर्क 

डॉ. बाबासाहेब आंबेडकर मराठवाडा विद्यापीठाच्या (Dr. Babasaheb Ambedkar Marathwada University) व्यवस्थापन परिषदेवर असलेले राज्यपाल नियुक्त सदस्य गजानन सानप (Governor-appointed member Gajanan Sanap) यांची तात्काळ हकालपट्टी करण्याची मागणी करण्यात आली आहे. विद्यापीठाच्या परीक्षा संचालक डॉ. भारती गवळी (Examination Director Dr. Bharti Gawli) यांनी डॉ. गजानन सानप यांनी अरेरावीची भाषा वापरत गैरवर्तन केल्याची तक्रार कुलपतींकडे केली आहे. 

डॉ. बाबासाहेब आंबेडकर मराठवाडा विद्यापीठाच्या व्यवस्थापन परिषदेवर राज्यपाल नियुक्ती सदस्याने केवळ दोन नव्हे, तर आतापर्यंत एकूण सहा जणांसोबत गैरवर्तन केल्याची धक्कादायक तक्रार व्यवस्थापन सदस्य, विद्या परिषदेचे सदस्य आणि अधिसभा सदस्य अशा २१ जणांनी राज्यपाल तथा कुलपती सी. पी. राधाकृष्णन यांच्याकडे निवेदनाद्वारे केली आहे. 

विद्यापीठाच्या व्यवस्थापन परिषदेवर कार्यरत ६ सदस्य, ११ सिनेट सदस्य आणि ३ अधिसभा सदस्यांनी कुलपतींना तक्रार पाठवली आहे. या तक्रारींमध्ये कुलगुरू डॉ. विजय फुलारी हे पदभार स्वीकारल्यापासून विद्यापीठाच्या प्रगतीसाठी प्रयत्न करत आहेत. मात्र, त्यांची अडवणूक करण्यासाठी राज्यपाल  नियुक्त व्यवस्थापन परिषद सदस्य डॉ. गजानन सानप हे प्रयत्न करत आहेत. त्यांनी यापूर्वी डॉ. आनंद वाघ यांच्यासोबत गैरवर्तन केले होते. त्यावर त्यांना राज्यपाल कार्यालयाकडून यापुढे विद्यापीठाच्या दैनंदिन कामकाजात हस्तक्षेप न करण्याच्या सूचना दिल्या होत्या. 

मात्र, त्यानंतरही २३ जानेवारीला परीक्षा संचालक डॉ. भारती गवळी यांच्यासोबत अरेरावीची भाषा वापरत गैरवर्तन केले आहे. तसेच डॉ. सानप यांनी कुलगुरूंचे सुरक्षा रक्षक, माजी व्यवस्थापन परिषद सदस्य किशोर शितोळे यांच्या नावाचा बोर्ड हटविण्यासाठी कार्यकारी अभियंता रवींद्र काळे, प्रभारी अधिष्ठाता डॉ. विणा हुंबे आणि रासेयोच्या संचालक डॉ. सोनाली क्षीरसागर यांच्यासोबतही आरडाओरड करून गैरवर्तन केल्याचा दावा तक्रारीमध्ये केला आहे. 

विद्यापीठातील अधिकारी, कर्मचारी दहशतीखाली आहेत. ही दहशत थांबविण्यासाठी डॉ. सानप यांचे सदस्यत्व रद्द करण्याची मागणी बामुक्टो, बामुक्टा, स्वाभिमानी मुप्टा, मराठवाडा शिक्षक संघ या शिक्षक, प्राध्यापकांच्या संघटनांसह रिपब्लिकन विद्यार्थी सेनेच्या पदाधिकाऱ्यांनी कुलगुरूमार्फत कुलपतींकडे केली आहे.