महाराष्ट्रात प्रथमच नवरोसजी वाडिया कॉलेजमध्ये शिकवला जाणार 'सायबर सुरक्षा आणि डिजिटल फॉरेन्सिक्स'चा अभ्यासक्रम

एज्युवार्ता न्यूज नेटवर्क

पुण्यातील मॉडर्न एज्युकेशन सोसायटीच्या नवरोसजी वाडिया कॉलेजमध्ये (Navrosji Wadia College of Modern Education Society, Pune) बी.एस्सी. 'सायबर सुरक्षा आणि डिजिटल फॉरेन्सिक्स' (B.Sc Cyber ​​Security and Digital Forensics) या नव्या अभ्यासक्रमाचे (New curriculum) उद्घाटन प्रमुख पाहुण्या म्हणून उपस्थित असलेल्या एएनए सायबर फॉरेन्सिक प्रायव्हेट लिमिटेडच्या संचालिका कैलाश नेवगी (Kailash Nevgi, Director, ANA Cyber ​​Forensic Pvt) यांच्या हस्ते करण्यात आले आहे.

बी. एस्सी. (सायबर सुरक्षा आणि डिजिटल फॉरेन्सिक्स) हा सावित्रीबाई फुले पुणे विद्यापीठाशी संलग्न असलेल्या विज्ञान आणि तंत्रज्ञान विद्याशाखेअंतर्गत तीन वर्षांचा/चार वर्षांचा व्यावसायिक पदवी कार्यक्रम असणार आहे. सायबर सुरक्षा आणि डिजिटल फॉरेन्सिकमधील कुशल व्यावसायिकांची वाढती गरज पूर्ण करणे हा या अभ्यासक्रमाचा उद्देश आहे.  

या अभ्यासक्रमात विद्यार्थ्यांना माहिती सुरक्षिततेची मूलभूत तत्त्वे, डिजिटल फॉरेन्सिक्स, सायबर गुन्हे आणि सायबर सुरक्षा, क्रिप्टोग्राफी आणि नेटवर्क सुरक्षा, नेटवर्क फॉरेन्सिक्स यांसारखे विविध विषय शिकवले जाणार आहेत.

कॉलेजमध्ये शिकवला जाणाऱ्या या नव्या अभ्यासक्रमाला भविष्यात खूप महत्व प्राप्त होणार आहे. त्याचबरोबर आम्ही संशोधन केलं तेव्हा एक लक्षात आले की, डिजिटल फॉरेन्सिकसाठी ३.४ दशलक्ष लोकांची आवश्यकता आहे परंतु ही लोकं मिळत नाही त्यामुळे महाविद्यालयाने सुरु केलेल्या या अभ्यासक्रमामुळे विद्यार्थ्यांना नवी दिशा मिळणार आहे असे मत प्रमुख पाहुण्या नेवगी यांनी व्यक्त केले आहे.

याचबरोबर मॉडर्न एज्युकेशन सोसायटीचे विश्वस्त सचिन सानप यांनी यावेळी बोलताना, आम्ही अशा नवीन आणि अभिनव अभ्यासक्रमाची सुरुवात करतोय ज्याला ‘सायबर सेक्युरीटी आणि डिजिटल फॉरेन्सिक्स’ असे नाव देण्यात आले आहे. या अभ्यासक्रमाचं वैशिष्ट्य म्हणजे हा केवळ महाराष्ट्रात नाही तर देशात अशा पद्धतीचा ब्लेंडेड वर्जन असलेला हा अभ्यासक्रम आहे. सायबर सेक्युरीटी आणि डिजिटल फॉरेन्सिक्स अशा दोन्हीही येणाऱ्या काळातल्या महत्वाच्या घटकांचं मिश्रण करून हा अभ्यासक्रम तयार करण्यात आला आहे. विद्यार्थ्यांना अभिनव आणि अद्ययावत अशा दोन्ही बाबी उपलब्ध करून देण्यात येणार आहे असे सांगितले.

यावेळी प्रा.डॉ.व्ही.व्ही.चाबुकस्वार, विभाग प्रमुख डॉ. पूनम पोंडे, डॉ. संतोष सोनवणे, डॉ. समिना बोसवाले, डॉ.चारुदत्त एस.निमकर, प्रा. डॉ. भारत बहुले यांच्यासह इतर प्राध्यापक, शिक्षक व विद्यार्थी मोठ्या संख्येने उपस्थित होते.