पुणे पदवीधर निवडणुकीसाठी इच्छुकांची गर्दी, राजकीय पक्षांची ताकद पणाला..

एज्युवार्ता न्यूज नेटवर्क

पुणे पदवीधर निवडणुकीसाठी (Pune Graduate Election) आत्तापासूनच इच्छुकांची गर्दी पाहायला मिळत आहे. गल्लीपासून दिल्लीपर्यंत सर्व सत्ता हातात असताना मागील निवडणूकीत महाविकास आघाडीकडून (Mahavikas Aghadi) झालेला पराभव भाजपच्या चांगलाच जिव्हारी लागला होता. ती उणीव भरून काढण्यासाठी यंदा मात्र भाजपने (BJP) कंबर कसली आहे. पुणे पदवीधर मतदार संघाचे महाविकास आघाडीचे आमदार अरुण लाड (MLA Arun Lad) यांचे सुपुत्र शरद लाड यांनी पदवीधर निवडणुकीसाठी भाजपात प्रवेश केला. त्यामुळे भाजपमधील इच्छुकांना चाप बसला आहे. मात्र, महाविकास आघाडीकडे उमेदवारीसाठी इच्छुकांनी गर्दी केली आहे.

कामाला लागा! राज्यात १७०० हून अधिक तलाठी पदांची भरती प्रक्रिया सुरू

मागील निवडणुकीसाठी महाविकास आघाडीतून अरुण लाड यांना उमेदवारी मिळाली. त्यांच्या विरोधात भाजपचे संग्रामसिंह देशमुख, मनसेच्या रुपाली पाटील, जनता दलाचे शरद पाटील, अपक्ष डॉ. श्रीमंत कोकाटे, बहुजन आघाडी सोमनाथ साळुंखे असे उमेदवार होते. मात्र, खरी लढत महाविकास आघाडी व भाजपमध्ये झाली. एकूण झालेल्या मतांपैकी २ लाख २८ हजार २५९ मते वैध ठरली तर तब्बल १९ हजार ४२८ मते अवैध ठरली. विजयासाठी १ लाख १४ हजार १३१ कोटा निश्चित करण्यात आला होता. महाविकास आघाडीचे उमेदवार अरुण लाड यांनी पहिल्याच फेरीत यांनी १ लाख २२ हजारांहून अधिक मतं घेत एकहाती विजय मिळवला होता. त्यांचे विरोधक भाजपचे उमेदवार संग्रामसिंह देशमुख यांना केवळ ७३ हजार एवढी मतं मिळाली. लाड यांचा ४८ हजार ८२४ मतांनी विजय झाला.

पुणे पदवीधर मतदार संघात पुणे, सांगली, सातारा, कोल्हापूर, सोलापूर हे जिल्हे येतात. भाजपकडून शरद लाड हे इच्छुक आहेत. तर दोन्ही शिवसेना, दोन्ही राष्ट्रवादी काँग्रेस, मनसे आणि जनसुराज्य पक्षातर्फे अनेक जण इच्छुक आहेत. नव्याने मतदार नोंदणीचा धडाका सुरू झाला आहे. प्रत्येक पक्षाचे गटनेते पदवीधरांची मत नोंदणी अधिक कशी होईल, याकडे लक्ष देत आहेत. आमदार अरुण लाड यांचे सुपुत्र शरद लाड यांनी पुणे पदवीधर मतदारसंघाची निवडणूक लक्षात घेऊन भाजपात प्रवेश केला आहे. आता त्यांना भाजपमधून उमेदवारी मिळते का, याबद्दल औत्सुक्य आहे. आमदार लाड यांच्या जागी महाविकास आघाडीसाठी सध्या तरी शिक्षकेतर संघटनेचे शिवाजीराव खांडेकर हे दावेदार मानले जात आहेत.

आमदार जयंत पाटील यांचे स्नेही व माजी खासदार एस. डी. पाटील यांचे नातू अॅड. धैर्यशील पाटील निवडणुकीसाठी रिंगणात उतरण्याच्या तयारीत आहेत. ते शिवाजी विद्यापीठाचे सिनेट सदस्य होते. मंत्री हसन मुश्रीफ यांचे निष्ठावंत समर्थक प्रताप माने हे या निवडणुकीच्या तयारीला लागले आहेत. राष्ट्रवादीलाच जागा मिळावी, यासाठी येथील नेतेमंडळी अग्रेसर आहेत. जनसुराज्यचे सुमित कदम यांच्या भूमिकेकडे सर्वांचि लक्ष लागून आहे. मनसेकडूनही काहीजण इच्छुक आहेत. उमेदवारी मिळाली नाही तर काहीजण अपक्षही लढण्याच्या तयारीत आहेत. त्यामुळे ही निवडणूक आतापासूनच रंगत असल्याचे दिसून येत आहे.