कुलसचिव निवडीपूर्वीच वादाला तोंड; वादग्रस्त व्यक्ती कुलसचिव पदी नको

एज्युवार्ता न्यूज नेटवर्क 

सावित्रीबाई फुले पुणे विद्यापीठाच्या (Savitribai Phule Pune University)कुलसचिव (Registrar)पदी वादग्रस्त व्यक्तीची निवड केल्यास जनआंदोलन उभे केले जाईल, असा इशारा खुद्द सावित्रीबाई फुले पुणे विद्यापीठातील कर्मचारी संघटनेने दिला आहे.तसेच कुलगुरूंनी राजकीय दबावाला बळी न पडता पारदर्शक व्यक्तीची कुलसचिव पदासाठी निवड करावी, अशी निवेदने विविध संघटना व माजी अधिसभा सदस्य यांनी कुलगुरू यांना दिली आहेत.त्यामुळे पुणे विद्यापीठ कुलसचिव पदाच्या निवड प्रक्रियेमुळे पुन्हा एकदा चर्चेत आले आहे.

विद्यापीठाच्या कुलसचिव पदाच्या मुलाखती नुकत्याच पार पडलेल्या.त्यामुळे कुलसचिव पदी कोणाची वर्णी लागणार याबाबत उत्सुकता निर्माण झाली होती. मात्र, काही संघटनांनी नियुक्ती जाहीर होण्यापूर्वीच कुलसचिव पदी डॉ.मनोहर सानप (manohar sanap) यांची निवड होणार असल्याची शक्यता व्यक्त करत त्यांच्या निवडीला विरोध केला आहे.सानप यांच्यावर महिलांना त्रास दिल्याच्या तक्रारी असून अशा वादग्रस्त व्यक्तीची निवड कुलसचिव पदी होणे योग्य नाही,अशी भूमिका काही विद्यार्थी संघटनांनी घेतली आहे.तर विद्यापीठाला भ्रष्टाचारी व अत्याचारी कुलसचिव हवा आहे का? असा सवाल स्डुडेंट हेल्पिंग हॅण्डचे कुलदीप आंबेकर यांनी उपस्थित केला आहे. 

------------

विद्यापीठाच्या कुलसचिव पदी डॉ.मनोहर सानप यांच्यासारख्या वादग्रस्त व्यक्तिची निवड करून विद्यापीठाला काय सिद्ध करायचे आहे. गुन्हा दाखल असलेले आणि महिला अत्याचारांचे आरोप असलेले व्यक्तीच विद्यापीठाला अधिकारी म्हणून हवे आहेत का? पारदर्शक व्यक्तीमत्वाचे अधिकारी विद्यापीठाला सापडत नाहीत का? अशा प्रकारे विद्यापीठ चुकीच्या व्यक्तीची निवड करणार असेल तर विद्यापीठाविरोधात आंदोलन उभे केले जाईल, वेळ प्रसंगी कायदेशीर मार्गाचा अवलंब केला जाईल.

- कल्पेश यादव, सहसचिव, युवा सेना, (उबाठा)

-----------------

 विद्यापीठाच्या शैक्षणिक निर्णय प्रक्रियेत राजकीय ढवळाढवळ होणे योग्य नाही. कुलसचिव पदाच्या नियुक्तीसाठी कुलगुरू यांच्यावर राजकीय दबाव आणने विद्यापीठाच्या व परिणामी विद्यार्थी हितासाठी चांगले नाही.त्यामुळे जर राजकिय दबावातून कुलसचिव पदी वादग्रस्त व्यक्तीची निवड होणार असेल तर आपोआपच त्यास विद्यापीठ हितचिंतकांकडून विरोध होईल. तसेच जे विरोध करणार नाहीत त्यांचे या निवडत काही हितसंबंध असण्याची शक्यता नाकारता येत नाही.त्यामुळेच मी कुलसचिव पदाची निवड प्रक्रिया सुरू असताना विद्यापीठाला निवेदन दिले होते.        

  - संतोष ढोरे, माजी अधिसभा सदस्य, सावित्रीबाई फुले पुणे विद्यापीठ 

-----------

वादग्रस्त व्यक्तीची कुलसचिव पदी नियुक्त करण्यात आली तर विद्यापीठातील कर्मचारी संघटनेच्या रोशाला सामोरे जावे लागले.तसेच कर्मचारी संघटना वादग्रस्त व्यक्तींविरोधात जनआंदोलन उभे करेल,असे लेखी निवेदन विद्यापीठातील कर्मचारी संघटनेने विद्यापीठाचे कुलगुरू डॉ सुरेश गोसावी यांना दिले आहे.