‘सीए’च्या परीक्षा वर्षात तीनवेळा होणार; डॉ. राजकुमार अडुकिया यांची माहिती

एज्युवार्ता न्यूज नेटवर्क 

बारावीनंतर सीए होण्यासाठी आयसीएआयच्या वतीने सीए फाउंडेशन, सीए इंटरमिजिएट व सीए अंतिम परीक्षा (CA Foundation, CA Intermediate and CA Final Exams) घेतली जाते. आतापर्यंत या तिन्ही परीक्षा वर्षांतून दोनवेळा घेतल्या जात होत्या. यावर्षीपासून सीए फाउंडेशन आणि सीए इंटरमिजिएट या दोन परीक्षा वर्षांतून तीनवेळा (CA Foundation and CA Intermediate exams thrice in a year) घेण्याचा निर्णय इन्स्टिट्यूट ऑफ चार्टर्ड अकाऊंटंट्स ऑफ इंडियाने (ICAI) घेतला आहे. अशी माहिती आयसीएआयच्या सेन्ट्रल कौन्सिलचे सदस्य व ‘बोर्ड ऑफ स्टडीज’चे चेअरमन डॉ. राजकुमार अडुकिया (Dr. Prince Adukiya) यांनी दिली.

‘आयसीएआय’च्या अकोला भेटीप्रसंगी त्यांनी पत्रकारांशी संवाद साधला. यावेळी डॉ. राजकुमार अडुकिया यांनी परीक्षा पद्धतीत झालेल्या बदलावर सविस्तर माहिती दिली. सनदी लेखापाल शाखेच्या विद्यार्थ्यां साठी बोर्ड ऑफ स्टडीज सातत्याने शैक्षणिक पॉलिसीच्या अनुषंगाने शैक्षणिक साहित्यात वारंवार बदल करीत असून ते अपडेट करीत असते. त्याचा लाभ विद्यार्थ्यांना होत असल्याचेही डॉ. अडुकिया यांनी यावेळी सांगितले. यावेळी अकोला शाखेचे चेअरमन सुमित आलिमचंदानी, सचिव हिरेन जोगी व सीए रमेश चौधरी मान्यवर आदी उपस्थित होते.

सीए शाखेच्या विद्यार्थ्यांसाठी बोर्ड ऑफ स्टडीज आयसीएआय सातत्याने शैक्षणिक साहित्य निर्माण करीत असून भारतात व विदेशात 'सीए'ची परीक्षा जेथे होते तेथे शैक्षणिक साहित्य व सिल्याबस बोर्ड ऑफ स्टडीज निर्माण करीत असते. या शैक्षणिक साहित्याच्या माध्यमातून विद्यार्थी पहिल्याच प्रयत्नात यशस्वी व्हावा, यासाठी बोर्ड ऑफ स्टडीज सातत्याने प्रयत्न करीत असल्याचे मत डॉ. अडुकिया यांनी व्यक्त केले. 

सीए फाउंडेशनची दरवर्षी सरासरी दीड लाख विद्यार्थी परीक्षा देतात. सीए इंटरमिजिएटसाठी अडीच लाख परीक्षार्थी असतात. बारावीत शिकणारे विद्यार्थीदेखील नोंदणी करून सीए फाउंडेशनची परीक्षा देऊ शकतील. मात्र, त्यांना मुदतीमध्ये बारावी उत्तीर्ण होणे बंधनकारक असेल, असे डॉ. अडुकिया म्हणाले.