CHB प्राध्यापकांना 2 दिवसात मान्यता;7 दिवसात मानधन 

एज्युवार्ता न्यूज नेटवर्क 

उच्च शिक्षण विभागांतर्गत येणाऱ्या महाविद्यालयांमध्ये तासिका तत्वावरील (CHB)अध्यापकांच्या सेवा उपलब्ध करून घेण्यासंदर्भात 17 ऑक्टोबर 2022 रोजी अध्यादेश प्रसिद्ध करण्यात आला आहे. त्यानुसार सर्व संबंधित शैक्षणिक संस्थांनी कार्यवाही करणे अपेक्षित आहे. परंतु,महाविद्यालय व विद्यापीठांनी तासिका तत्वावरील प्राध्यापकांच्या (CHB Professor)मान्यतेची प्रक्रियाच वेळेत पूर्ण केली नाही. त्यामुळे त्यांना सुमारे अडीच महिन्यांपासून मानधन (honorarium)मिळाली नाही. मात्र, येत्या 2 दिवसात मान्यतेची प्रक्रिया पूर्ण करून 7 दिवसात मानधन अदा करावे, अशा सूचना राज्याचे उच्च शिक्षण संचालक डॉ.शैलेंद्र देवळाणकर (Director of Higher Education Dr. Shailendra Devlankar)यांनी दिले आहेत.

नेट सेट पीएचडी धारक संघर्ष समितीसह विविध संघटनांनी वेळोवेळी प्राध्यापकांच्या मागण्यांसाठी आंदोलन केले आहे. त्यामुळे राज्याच्या उच्च शिक्षण विभागाने या संदर्भात सविस्तर शासन निर्णय प्रसिद्ध केला. या शासन निर्णयानुसार 15 फेब्रुवारी रोजी महाविद्यालयातील कार्यभार तपासणी करणे अपेक्षित आहे. 1 मार्चपर्यंत संबंधित सहसंचालक कार्यालयाकडे ना हरकत प्रमाणपत्र मागणी करणे गरजेचे आहे.या कार्यालयाकडून 15 मार्चपर्यंत ना हरकत प्रमाणपत्र निर्गमित करणे अपेक्षित आहे. शासन निर्णयानुसार संबंधित महाविद्यालयाने 1 एप्रिलपर्यंत जाहिरात प्रसिद्ध करणे बंधनकारक आहे. जाहिरातीनुसार प्राप्त झालेल्या उमेदवारांच्या अर्जांची तपासणी,मुलाखत व निवड प्रक्रिया 15 एप्रिलपर्यंत करायला हवी. पात्र उमेदवारांना 30 एप्रिलपर्यंत नेमणुकांचे आदेश द्यायला हवेत. विद्यापीठांनी 31 मे पर्यंत मान्यता देण्याची प्रक्रिया पूर्ण करणे गरजेचे आहे. परंतु,ऑगस्ट महिना संपला तरीही अद्याप विद्यापीठांनी प्राध्यापकांना मान्यता दिलेली नाही. या पार्श्वभूमीवर उच्च शिक्षण संचालक डॉ.शैलेंद्र देवळांकर यांनी परिपत्रक काढले आहे.

विद्यापीठ स्तरावर प्रलंबित असलेले तासिका तत्वावरील अध्यापकांच्या नियुक्तीस मान्यता मिळणे बाबतचे प्रस्ताव दोन दिवसात निकाली काढण्यात यावेत. तसेच सर्व विभागीय सहसंचालक यांनी विशेष शिबिराचे आयोजन करून संबंधित महाविद्यालयाकडून मानधन अदायगीचे देयके स्वीकारावेत. देयके प्राप्त झाल्यानंतर सात दिवसांमध्ये तासिका तत्वावरील नियुक्त अध्यापकांना मानधन अदा करण्याची कार्यवाही पूर्ण करावी, असेही आदेश डॉ. देवळाणकर यांनी दिले आहेत.