सेट परीक्षेचा निकाल जाहीर; निकाल 6.69 टक्के, एकूण 6 हजार 50 विद्यार्थी उत्तीर्ण
15 जून 2025 रोजी घेण्यात आलेल्या परीक्षेसाठी 1 लाख 10 हजार 412 विद्यार्थ्यांनी अर्ज केले होते. त्यातील प्रत्यक्षात 90 हजार 366 विद्यार्थ्यांनी परीक्षा दिली.
eduvarta@gmail.com 
एज्युवार्ता न्यूज नेटवर्क
सहाय्यक प्राध्यापक पदाच्या पात्रतेसाठी घेतल्या जाणाऱ्या सेट परीक्षेचा निकाल शनिवारी पाच वाजता जाहीर झाला आहे. सावित्रीबाई फुले पुणे विद्यापीठाच्या सेट विभागातर्फे 15 जून 2025 रोजी 40 वी सेट परीक्षा घेण्यात आली होती. या परीक्षेचा निकाल 6.69 टक्के लागला असून 6 हजार 50 विद्यार्थी उत्तीर्ण झाले आहेत. विद्यार्थी https://setexam.unipune.ac.in या संकेतस्थळावर निकाल पाहू शकतात.
महाराष्ट्र व गोवा राज्यातील विद्यार्थ्यांसाठी विद्यापीठाच्या सेट विभागातर्फे सेट परीक्षा आयोजित केली जाते. 15 जून 2025 रोजी घेण्यात आलेल्या परीक्षेसाठी 1 लाख 10 हजार 412 विद्यार्थ्यांनी अर्ज केले होते. त्यातील प्रत्यक्षात 90 हजार 366 विद्यार्थ्यांनी परीक्षा दिली. 26 ऑगस्ट रोजी विद्यापीठाने परिपत्रक प्रसिद्ध करून 30 ऑगस्ट रोजी सेट परीक्षेचा निकाल जाहीर केला जाईल,असे प्रसिद्ध केले होते. त्यानुसार 30 ऑगस्ट रोजी सायंकाळी 5 वाजल्यापासून विद्यार्थ्यांना निकाल पाहण्यासाठी उपलब्ध करून देण्यात आला आहे.
विद्यापीठ अनुदान आयोगाच्या मार्गदर्शक तत्त्वानुसार महाराष्ट्र व गोवा राज्यातील विद्यापीठ व महाविद्यालयात सहाय्यक प्राध्यापक पदाची पात्रता परीक्षा घेण्यासाठी विद्यापीठाच्या सेट विभागाला प्राधिकृत करण्यात आले आहे. आत्तापर्यंत सेट विभागाने 40 परीक्षा घेतल्या आहेत.
