CET Cell : बीपीएड सीईटीच्या प्रवेश नोंदणीसाठी मुदतवाढ, 'या' तारखेपर्यंत करता येणार अर्ज

एज्युवार्ता न्यूज नेटवर्क

राज्य सामाईक प्रवेश परीक्षा (State Common Entrance Examination) कक्षाकडून (सीईटी सेल) बॅचलर ऑफ फिजिकल एज्युकेशन (बीपीएड) (B.P.Ed Curriculum) या अभ्यासक्रमाची प्रवेश प्रक्रिया (B.P.Ed. course admission process) राबविण्यात येत आहे. मात्र मागील तीन वर्षांमध्ये या अभ्यासक्रमाकडे विद्यार्थ्यांचा कल कमी झाला आहे. यंदाच्या नोंदणी प्रक्रियेमध्येही त्याचे पडसाद दिसत आहेत. १६ जानेवारी ते २ फेब्रुवारीपर्यंत राबविण्यात आलेल्या नोंदणी प्रक्रियेत फक्त २ हजार ६३८ विद्यार्थ्यांनी नोंदणी केली. त्यामुळे सीईटी कक्षाने नोंदणी प्रक्रियेला १७ फेब्रुवारीपर्यंत मुदतवाढ (The registration process has been extended until February 17th) देण्यात आली आहे.

मागील तीन वर्षांमध्ये बीपीएड अभ्यासक्रमाकडे विद्यार्थ्यांचा कल कमी होत आहे. २०२३-२४ मध्ये या अभ्यासक्रमासाठी ९ हजार ३९९ विद्यार्थ्यांनी नोंदणी केली होती. २०२४-२५ मध्ये ही नोंदणी ७ हजार ३९९ तर २०२५-२६ मध्ये ६ हजार ५९८ विद्यार्थ्यांनी नोंदणी केली. विद्यार्थ्यांकडून अधिकाधिक नोंदणी व्हावी यासाठी विविध उपक्रम राबविण्यात येत आहेत. सीईटी कक्षाकडून बीपीएड अभ्यासक्रमाच्या अर्ज नोंदणी प्रक्रियेला १६ जानेवारी रोजी सुरुवात करण्यात आली होती. नोंदणी करण्यासाठी २ फेब्रुवारी ही अंतिम मुदत देण्यात आली होती. मात्र या अभ्यासक्रमासाठी आतापर्यंत २ हजार ६३८ विद्यार्थ्यांनी नोंदणी केली आहे.

दरम्यान, मागील वर्षीच्या तुलनेत या अभ्यासक्रमासाठी फारच कमी नोंदणी झाली असून अद्यापपर्यंत अनेक विद्यार्थ्यांनी नोंदणी केलेली नाही. तसेच बीपीएड या अभ्यासक्रमाची प्रवेश परीक्षा ४ एप्रिल २०२६ रोजी होणार आहे. तर याची फिल्ड परीक्षा ५ ते ७ एप्रिल २०२६ रोजी होणार आहे. ही बाब लक्षात घेता या अभ्यासक्रमासाठी सीईटी कक्षाकडून अर्ज नोंदणी करण्यास १७ फेब्रुवारीपर्यंत मुदतवाढ देण्यात आली आहे.

या परीक्षेसाठी ऑनलाईन अर्ज, नोंदणी वेळापत्रक आणि माहिती पुस्तिका राज्य सामाईक प्रवेश परीक्षा कक्षाच्या http://www.mahacet.org या अधिकृत संकेतस्थळावर उपलब्ध करून देण्यात आली आहे. या अभ्यासक्रमांसाठीची सीईटी परीक्षा महाराष्ट्र राज्यातील विविध परीक्षा केंद्रांवर संगणकाधारित पद्धतीने ऑनलाईन घेतल्या जातील. उमेदवारांनी पुढील अद्ययावत माहिती, तपशीलवार वेळापत्रक आणि परीक्षेशी संबंधित सूचनांसाठी नियमितपणे राज्य सामाईक प्रवेश परीक्षा कक्षाच्या अधिकृत संकेतस्थळाला भेट द्यावी, असे आवाहन सीईटी कक्षाने केले आहे.