सीबीएसई बोर्डाचा मोठा निर्णय, 'या' कारणामुळे दहावी, बारावीच्या परीक्षा पुढे ढकलल्या 

एज्युवार्ता न्यूज नेटवर्क

परदेशात शिक्षण घेणाऱ्या भारतीय विद्यार्थ्यांसाठी एक मोठी अपडेट समोर आली आहे. केंद्रीय माध्यमिक शिक्षण मंडळाने (CBSE) मध्य पूर्व प्रदेशात (Middle East region) २ मार्च २०२६ रोजी होणाऱ्या दहावी आणि बारावीच्या परीक्षा पुढे ढकलल्या (Exams postponed) आहेत. सध्या तिथे असलेल्या युद्धजन्य परिस्थितीमुळे (Warlike situation) बहरीन, इराण, कुवेत, ओमान, कतार, सौदी अरेबिया आणि युएईमध्ये कार्यरत असलेल्या सीबीएसईशी संलग्न शाळांसाठी (CBSE affiliated school) खबरदारीचा उपाय म्हणून हा निर्णय घेण्यात आला आहे.

५ मार्चनंतरच्या परीक्षांबाबत अंतिम निर्णय ३ मार्च रोजी होणाऱ्या आढावा बैठकीनंतर घेतला जाईल, असे बोर्डाने स्पष्ट केले आहे. सुधारित तारखा लवकरच जाहीर केल्या जातील आणि शाळांद्वारे अधिकृत माहिती उपलब्ध केली जाईल. युद्धजन्य परिस्थिती पार्श्वभूमीवर विद्यार्थ्यांना घाबरू नका आणि नियमितपणे परीक्षेची तयारी सुरू ठेवण्याचे आवाहन करण्यात आले आहे. फक्त २ मार्च २०२६ रोजी होणाऱ्या परीक्षा रद्द करण्यात आल्या नाहीत, पुढे ढकलण्यात आल्या आहेत. पुढील परीक्षा तेथील परिस्थिती पाहाता वेळापत्रकानुसार घेण्याचा विचार सुरू आहे.

विद्यार्थ्यांच्या सुरक्षेला प्राधान्य देणारे पाऊल म्हणून शिक्षण क्षेत्रात या निर्णयाकडे पाहिले जात आहे. मंडळाने पालकांना आणि विद्यार्थ्यांना अफवा टाळण्याचे आणि फक्त अधिकृत घोषणांवर अवलंबून राहण्याचे आवाहन केले आहे. परिस्थिती संवेदनशील असली तरी, मंडळ विद्यार्थ्यांचे शैक्षणिक भविष्य सुरक्षित करण्यासाठी सतर्क आहे हे स्पष्ट करण्यात आले आहे. कृपया नवीन तारखांची वाट पहा, तयारी सुरू ठेवा आणि अफवांपासून सावध रहा, असे आवाहन बोर्डाकडून करण्यात आले आहे.