अनाधिकृत शाळेमुळे दहावीचे विद्यार्थी परीक्षेपासून वंचित; शाळेच्या इमारतीत 'लॉटरी'चे दुकान
मुंब्रा परिसरातील 'न्यू मॉडेल इंग्लिश स्कूल' ही शाळा अनधिकृत असल्याचे शिक्षण विभागाच्या तपासात उघड झाले. या शाळेला बंद करण्याबाबत आणि दंडात्मक कारवाईबाबत नोटीसही बजावण्यात आली.
eduvarta@gmail.com 
एज्युवार्ता न्यूज नेटवर्क
महाराष्ट्र राज्य माध्यमिक शिक्षण मंडळाच्या (Maharashtra State Board of Secondary Education) इयत्ता दहावीच्या परीक्षा (10th standard exams) २० फेब्रुवारीपासून सुरू झाल्या आहेत. मात्र, या परीक्षेपासून वंचित राहण्याचा फडका मुंब्रा परिसरातील 'न्यू मॉडेल इंग्लिश स्कूल' (New Model English School) शाळेत शिक्षण घेणाऱ्या विद्यार्थ्यांना बसला आहे. कारण ते शिक्षण घेत असलेली न्यू मॉडेल इंग्लिश स्कूल शाळा अनधिकृत निघाली आहे. त्यामुळे विद्यार्थ्यांना परीक्षेला बसता आले नाही. मात्र, ठाणे महापालिका शिक्षण विभागाने यावर तोडगा काढला (Education Department's solution)आहे. त्यानंतर आता संबंधित विद्यार्थ्यांचे अर्ज एका मान्यताप्राप्त शाळेमार्फत भरले जातील, जेणेकरून त्यांना जून-जुलै २०२६ मध्ये होणाऱ्या परीक्षेस बसता येईल, असे आश्वासन दिले आहे.
मुंब्रा परिसरातील 'न्यू मॉडेल इंग्लिश स्कूल' ही शाळा अनधिकृत असल्याचे शिक्षण विभागाच्या तपासात उघड झाले. या शाळेला बंद करण्याबाबत आणि दंडात्मक कारवाईबाबत नोटीसही बजावण्यात आली. धक्कादायक बाब म्हणजे, शाळेच्या इमारतीच्या तळमजल्यावर चक्क 'लॉटरी'चे दुकान सुरू असल्याचे निदर्शनास आले. शाळेला शासकीय मान्यता नसल्यामुळे दहावीचे परीक्षा अर्ज भरण्यास तांत्रिक अडचणी निर्माण झाल्या. त्यामुळे शाळेतील विद्यार्थ्यांना परीक्षेपासून वंचित राहावे लागले.
त्यानंतर पालकांनी ठाणे महापालिका शिक्षण विभागाच्या कार्यालयात धाव घेतली. परिस्थितीचे गांभीर्य लक्षात घेऊन शिक्षणाधिकारी यांच्यासोबत आलेल्या पथकाने शाळेला प्रत्यक्ष भेट दिली. पालक आणि विद्यार्थ्यांशी संवाद साधून शिक्षण विभागाने तातडीने हस्तक्षेप करत या विद्यार्थ्यांचे शैक्षणिक नुकसान होऊ दिले जाणार नाही, अशी ठाम ग्वाही दिली.
तसेच अनधिकृत शाळा तत्काळ बंद करून विद्यार्थ्यांना इतर मान्यताप्राप्त शाळांमध्ये प्रवेश देण्याचे निर्देश देण्यात आले आहेत. प्रवेश घेताना शाळेची अधिकृतता तपासूनच पाऊल उचलावे. अनधिकृत शाळांच्या जाळ्यात अडकून मुलांचे भविष्य धोक्यात घालू नका, असे आवाहन शिक्षण विभागाने पालकांना केले आहे.
